काठमाडौं । मोलुङ्ग हाइड्रोपावर कम्पनी लिमिटेडको आईपीओ आईपीओमा माग भन्दा ५ दशमलव १५ गुणा बढी आवेदन परेको छ । सिडिएस एण्ड क्लियरिङ्ग लिमिटेडका अनुसार सोमवार १०ः१५ सम्ममा १० लाख ३६ हजार ३८८ जना आवेदकले १ करोड १६ लाख ७५ हजार ४४० कित्ताका लागि आवेदन दिएका हुन् ।

कम्पनीले सार्वजनिक निष्कासनमार्फत फागुन ४ गते बाट २२ लाख ६४ हजार ६५५ कित्ता शेयर सर्वसाधारणमा विक्री खुला गरेको हो । आयोजना प्रभावित क्षेत्रका स्थानीय बासिन्दा तथा विदेशमा रोजगारी गरिरहेका नेपालीका लागि आईपीओ बाँडफाँटपछि कम्पनीले सर्वसाधारणका लागि आईपीओ निष्कासन गरेको हो ।

कम्पनीले आफ्नो जारी पूँजीको ३४ प्रतिशतले हुन आउने रू. २७ करोड २८ लाख ५० हजार बराबरको २७ लाख २८ हजार ५०० कित्ता शेयर सर्वसाधारणका लागि छुट्याएको थियो ।

त्यसमध्ये १० प्रतिशत अर्थात २ लाख ७२ हजार ८५० कित्ता शेयर वैदेशिक रोजगारीमा रहेका नेपाली र ५ प्रतिशत अर्थात १ लाख ३६ हजार ४२५ कित्ता शेयर सामूहिक लगानी कोषहरूमा बाँडफाँट गरिसकिएको छ । २ प्रतिशत अर्थात ५४ हजार ५७० कित्ता शेयर कम्पनीमा कार्यरत कर्मचारीका लागि छुट्याएर बाँकी शेयर सार्वजनिक निष्कासनमा ल्याइएको हो ।

कम्पनीको आईपीओमा मागभन्दा बढी आवेदन परेकाले यो आईपीओ छिटो अवधि फागुन १० गतेसम्म मात्र विक्रीमा रहने देखिन्छ । लगानीकर्ताले न्यूनतम १० कित्तादेखि अधिकतम ८ हजार कित्तासम्म माग गर्दै आवेदन दिन सक्ने व्यवस्था छ । 

कम्पनीको शेयर निष्कासन तथा बिक्री प्रबन्धक सनराइज क्यापिटल लिमिटेड रहेको छ । लगानीकर्ताले नेपाल धितोपत्र बोर्डबाट स्वीकृतिप्राप्त सम्पूर्ण आस्बा सदस्य बैंक तथा वित्तीय संस्थाहरू र तिनका तोकिएका शाखा कार्यालयहरूबाट सी(आस्बा प्रणालीमार्फत आवेदन दिन सक्नेछन् ।

ओखलढुंगा जिल्लामा निर्मित ७ मेगावाटको क्षमताको मोलुङ्गखोला जलविद्युत आयोजनाबाट कम्पनीले २०७४ चैत १२ गतेदेखि विद्युत उत्पादन गर्दै आएको छ । आयोजनाको कुल निर्माण लागत रू. १ अर्ब ४५ करोडभन्दा बढी रहेको छ भने प्रतिमेगावाट लागत रू. २० करोडभन्दा बढी छ ।