काठमाडौं । नेपालमै पहिलो पटक नेपाल इन्फ्रास्ट्रक्चर बैंक लिमिटेड (निफ्रा)ले जेठ १८ गतेदेखि ग्रीन बण्ड जारी गर्न लागेको छ ।

कम्पनीले ७ वर्ष अवधिको वार्षिक ६ प्रतिशत ब्याजदरमा ‘निफ्रा हरित उर्जा ऋणपत्र ६ प्रतिशत २०८८/८९’ निष्कासन गर्न लागेको हो । 

कम्पनीले प्रतिऋणपत्र १ हजार रुपैयाँ अंकित मूल्यका ५ अर्ब रुपैयाँ बराबरको ५० लाख कित्ता ऋणपत्र निष्कासन गर्न लागेको हो । कुल कित्ता ऋणपत्रमध्ये ६० प्रतिशत अर्थात् ३ अर्ब रुपैयाँ बराबरको ३० लाख कित्ता ऋणपत्र व्यक्तिगत तवरबाट विक्री गरिनेछ भने बाँकी ४० प्रतिशत अर्थात २ अर्ब रुपैयाँ बराबरको २० लाख कित्ता ऋणपत्र भने सर्वसाधारणमा विक्री गरिनेछ ।

सर्वसाधारणतर्फको कुल कित्ता ऋणपत्रमध्ये सामूहिक लगानीकोषका लागि १ लाख कित्ता बाँडफाँट गरी बाँकी १९ लाख कित्ता ऋणपत्र भने सार्वजनिक निष्कासनमा ल्याउन लागिएको हो । 

सार्वजनिक निष्कासनमा आएको ऋणपत्र खरीदका लागि लगानीकर्ताहरूले न्यूनतम २५ कित्तादेखि अधिकतम १० लाख कित्तासम्म माग गर्न सक्नेछन् । निष्कासन अवधि छिटोमा जेठ २१ गतेका लागि तय गरिएको छ भने सो अवधिसम्म माग बमोजिम आवेदन नपरेमा ढिलोमा असार १ गतेसम्म निष्कासन लम्बिनेछ । 

ऋणपत्र निष्कासन तथा विक्री प्रबन्धकमा एनआइएमबि एस क्यापिटल लिमिटेड रहेको छ । विक्री प्रबन्धकसँगै लगानीकर्ताले नेपाल धितोपत्र बोर्डबाट अनुमतिप्राप्त सम्पूर्ण आस्बा सदस्य बैंक तथा वित्तीय संस्था र तिनका तोकिएका शाखा कार्यालयबाट आवेदन दिन पाइनेछ । साथै मेरो शेयर अनलाइनमार्फत पनि आवेदन दिन सकिनेछ । 

यो ऋणपत्र निष्कासनका लागि गराएको रेटिङमा इक्रा नेपालले कम्पनीलाई वित्तीय दायित्व पूरा गर्ने सम्बन्धमा मध्यम मात्रामा सुरक्षित रहेको संकेत गर्ने इक्राएनपी इस्यूअर ट्रिपल बी रेटिङ प्रदान गरेको छ ।

कम्पनीले हरित ऊर्जासँग सम्बन्धित परियोजनाहरूमा लगानी वृद्धिका लागि आवश्यक रकम जुटाउन यो ऋणपत्र जारी गर्न लागेको जानकारी दिएको छ । यस ऋणपत्रबाट प्राप्त रकम शौर्य ऊर्जा उत्पादन तथा २५ मेगावाटसम्म क्षमता जडित रन अफ रिभर जलविद्युत परियोजना विकास गर्नका लागि प्रयोग गर्ने भनाइ कम्पनीको छ ।

कम्पनीले तयार गरेको ग्रीन बण्ड फ्रेमवर्कको अधिनमा रही तोकिएका क्षेत्रहरूमा कर्जा प्रवाह नहुँदासम्म अल्पकालीन तरल सम्पत्तिमा मात्र लगानी गर्ने तयारी कम्पनीको छ । यो ऋणपत्रमा आर्जित ब्याज रकम प्रत्येक आर्थिक वर्षको प्रथम अर्थवार्षिक र दोस्रो अर्धवार्षिक समाप्त भएपश्चात कर कट्टा गरी भुक्तानी गरिने जानकारी समेत कम्पनीले दिएको छ ।

ग्रीन बण्ड पहिलो पटक जारी हुन लागेको र यसले ऋणपत्रको बजारमा विविधीकरण कायम गर्ने विश्वास सरोकारवालाहरूको छ ।