काठमाडौं । पुनर्बीमा कम्पनीका लागि पूँजी वृद्धि गर्ने समयसीमा १ वर्ष थप भएको छ । नेपाल बीमा प्राधिकरणले नेपालमा सञ्चालित पुनर्बीमा कम्पनीहरूलाई २० अर्ब रुपैयाँ चुक्तापूँजी कायम गर्न २०८० माघ १७ गते निर्देशन दिँदै २०८१ माघ मसान्तसम्मको समयसीमा तोकेको थियो ।
तोकिएको अवधिभित्र पुनर्बीमा कम्पनीहरूले तोकिएको पूँजी कायम गर्न नसकेपछि समयसीमा १ वर्ष थप गरी २०८२ माघ मसान्तसम्म कायम गरिएको हो । प्राधिकरणका कानून विभाग प्रमुख साम्भराज लामिछानेले पुसमै पुनर्बीमा कम्पनीका लागि पूँजी बढाउने समयसीमा १ वर्ष थप गर्ने निर्णय भएको जानकारी दिए । ‘माघ मसान्तभित्र पुनर्बीमा कम्पनीहरूले पूँजी पुर्याउन नसक्ने देखेपछि अवधि थप गर्ने निर्णय भएको हो,’ लामिछानले भने ।
नेपालमा हाल दुई पुनर्बीमा कम्पनी नेपाल पुनर्बीमा कम्पनी र हिमालयन रिइन्स्योरेन्स कम्पनीले पुनर्बीमा सेवा प्रदान गर्दै आएका छन् । यी कम्पनीले सर्वसाधारणमा समेत प्रारम्भिक धितोपत्र निष्कासन (आईपीओ) गरिसकेका छन् । नेपाल पुनर्बीमा कम्पनीको चुक्तापूँजी हाल १३ अर्ब ४२ करोड २१ लाख ८७ हजार रुपैयाँ छ । हिमालयन रिइन्स्योरेन्सको चुक्तापूँजी १० अर्ब ४० करोड रुपैयाँ छ । प्राधिकरणले तोकेको चुक्तापूँजी कायम गर्न नेपाल पुनर्बीमालाई थप ६ अर्ब ५७ करोड ७८ लाख १३ हजार रुपैयाँ र हिमालयन रिइन्स्योरेन्सलाई थप ९ अर्ब ६० करोड रुपैयाँ पूँजी आवश्यक हुन्छ । यी कम्पनीहरूले बोनस र हकप्रदमार्फत पूँजी बढाउने योजना बनाएकोमा प्राविधिक कारणले समयमै पूँजी पुर्याउन नसकेको लामिछानेले बताए ।
- अब २०८२ साल माघ मसान्तसम्ममा तोकिएको चुक्ता पूँजी २० अर्ब रुपैयाँ कायम गरे हुने
- हालको चुक्तापूँजी नेपाल पुनर्बीमा कम्पनीको १३ अर्ब ४२ करोड २१ लाख ८७ हजार र हिमालयन रिइन्स्योरेन्सको १० अर्ब ४० करोड रुपैयाँ
हिमालयन रिइन्स्योरेन्स कम्पनीले ८० प्रतिशत हकप्रद शेयर निष्कासन गर्नेछ । कम्पनीले हकप्रद शेयर निष्कासन गर्ने प्रस्ताव २०८० साल फागुन २० गते सम्पन्न वार्षिक साधारणसभाबाट पारित गराइसकेको छ । आर्थिक वर्ष (आव) २०७९/८० को मुनाफाबाट वितरण गरेको ४ प्रतिशत बोनस शेयरपछि कायम हुने चुक्तापूँजी १० अर्ब ४० करोड रुपैयाँको आधारमा कम्पनीले ८० प्रतिशत हकप्रद शेयर निष्कासन गर्नेछ । कम्पनीले १० शेयर बराबर ८ को अनुपातमा ८ अर्ब ३२ करोड रुपैयाँ बराबरको हकप्रद शेयर निष्कासन गर्न लागेको हो ।
हकप्रदपछि कम्पनीको चुक्तापूँजी १८ अर्ब ७२ करोड रुपैयाँ कायम हुनेछ । नेपाल बीमा प्राधिकरणले पुनर्बीमा कम्पनीका लागि तय गरेको न्यूनतम चुक्तापूँजी कायम गर्न हिमालयन रिइन्स्योरेन्सलाई ८० प्रतिशत हकप्रदपछि पनि थप १ अर्ब २८ करोड रुपैयाँ आवश्यक हुन्छ । यस कम्पनीले प्रिमियम मूल्यसहित आईपीओ विक्री गरेकाले उक्त रकमलाई शेयरमा पूँजीकरण गर्न सकिने व्यवस्था छ । तर, हाल यो विषय सर्वोच्चमा विचाराधीन अवस्थामा रहेकाले कम्पनीले आधिकारिक निर्णय गर्न सकेको छैन ।
सर्वोच्च अदालतबाट प्रिमियममा विक्री गरिएको शेयरलाई मान्यता दिएमा कम्पनीले प्रिमियमबापतको रकम शेयर पूँजीकरणका लागि बोनस शेयरलाई माध्यम बनाउन सक्ने सम्भावना प्राधिकरणले औंल्याएको छ । हिमालयन रिइन्स्योरेन्सले प्रतिकित्ता १०० रुपैयाँ अंकित मूल्यमा प्रिमियमबापत १०६ रुपैयाँ थप गरी ३ करोड कित्ता शेयर विक्री गरेको थियो । प्रिमियमबापत यो कम्पनीले ३ अर्ब १८ करोड रुपैयाँ संकलन गरेको थियो । यी दुवै कम्पनीले गत आवको वार्षिक साधारणसभा गर्न बाँकी छ । हिमालयन रिइन्स्योरेन्सले आव २०७९/८० को मुनाफाबाट पहिलोपटक लाभांश वितरण गरेको हो । नेपाल पुनर्बीमा कम्पनीले भने २०७६/७७ सालदेखिनै निरन्तर लाभांश वितरण गर्दै आएको छ । बोनस शेयर र हकप्रद शेयरलाई नै पूँजी वृद्धिको उपयुक्त माध्यम बनाएका कम्पनीहरूले गतवर्षको मुनाफाबाट बोनस शेयर वितरण गरेर पनि पूँजी बढाउन सक्नेछन्
