काठमाडौं । राधी विद्युत कम्पनी लिमिटेडले चैत ३ गते विशेष साधारण सभा आह्ववान गरेको छ ।

फागुन १६ गते बसेको कम्पनीको सञ्चालक समितिको बैठकले ललितपुर चापागाउँस्थित वेलकम पार्टी प्यालेसमा बिहान ८ बजे सभा गर्ने निर्णय गरेको हो । सभाले हकप्रद शेयर निष्कासनपश्चात् कायम हुने चुक्तापूँजी बराबर हुने गरी जारी पूँजी संशोधन सहित कम्पनीको प्रबन्धपत्र तथा नियमावली संशोधन गर्नेछ ।

त्यसका लागि नियामक निकायको निर्देशनबमोजिम काम गर्ने जिम्मेवारी सञ्चालक समितिलाई दिने प्रस्ताव पनि सभाका लागि तय भएको छ । साथै कम्पनीको नियमावली बमोजिम २ जना सञ्चालक नियुक्ति गर्ने र स्वतन्त्र सञ्चालक नियुक्तिको विषयलाई पनि सभाले अनुमोदन गर्नेछ ।

साधारण सभा प्रयोजनका लागि कम्पनीले फागुन २५ गते एक दिन बुक क्लोज गर्न लागेको छ । बुक क्लोजको आधारमा अघिल्लो कारोबार दिन फागुन २२ गतेसम्म कायम शेयरधनीहरू मात्र सभामा भाग लिन योग्य हुनेछन् ।