काठमाडौं । सानिमा इक्वीटी फण्ड र सानिमा लार्ज क्याप फण्डले माघ मसान्तसम्मको खुद सम्पत्ति मूल्य विवरण सार्वजनिक गरेका छन् ।

विवरणअनुसार दुवै फण्डको न्याभ पुस महीनाको तुलनामा फागुन महीनामा घटेको छ । पुस मसान्तसम्म रू. १३ दशमलव ४९ रहेको सानिमा इक्वीटी फण्डको न्याभ माघ मसान्तमा घटेर रू. १३ दशमलव शून्य २ कायम भएको छ । 

त्यस्तै सानिमा लार्ज क्याप फण्डको न्याभ माघ मसान्तसम्म रू. ९ दशमलव ६८ कायम भएको छ । यस फण्डको न्याभ पुस मसान्तसम्म रू. ९ दशमलव ७९ थियो । न्याभसँगै फण्डको नाफा पनि घटेको छ ।

फण्डले पुस मसान्तसम्म रू. १० करोड ७७ लाख नाफा कमाएकोमा माघ मसान्तसम्ममा घटेर रू. ९ करोड ४७ लाखमा झरेको छ । माघ महीनामा फण्डको खर्चमा वृद्धि भई आम्दानी घटेकाले नाफा घटेको हो । यस फण्डले माघ मसान्तसम्म सूचीकृत शेयरमा रू. ६६ करोड ४०  लाख लगानी गरेको छ । 

सानिमा इक्वीटी फण्डले माघ मसान्तसम्ममा रू. १० करोड ६१ लाख नाफा कमाएको छ । यो नाफा पुस मसान्तको तुलनामा ३६ प्रतिशत कम हो । सो अवधिमा फण्डले रू. १६ करोड ६९ लाख नाफा कमाएको थियो ।

माघ महीनामा फण्डको आम्दानीमा कमी आएसँगै नाफा घटेको हो । फण्डले पुस मसान्तसम्म रू. १८ करोड २८ लाख आम्दानी गरेकोमा माघ मसान्तसम्ममा रू. १२ करोड ४६ लाखमा सीमित भएको छ । यस फण्डले माघ मसान्तसम्म सूचीकृत शेयरमा रू. १ अर्ब १२ करोडभन्दा बढी लगानी गरेको छ ।