काठमाडौं । सानिमा म्युचुअल फण्ड अन्तर्गत सञ्चालित सानिमा इक्वीटी फण्डले कात्तिक महीनाको खुद सम्पत्ति मूल्य विवरण सार्वजनिक गरेको छ । उक्त वित्तीय विवरण अनुसार कम्पनीको नोक्सानी असोज महीनाको तुलनामा कात्तिक महीनामा बढेको छ । असोज मसान्तमा फण्ड रू. ९ करोड ६९ लाख नोक्सानीमा रहेकोमा कात्तिक मसान्तमा बढेर रू. १० करोड ३६ लाख पुगेको छ । कात्तिक महीनाको फण्डको खर्चमा वृद्धिभएसँगै जम्मा आम्दानी रू. ९ करोड ३६ लाख ऋणात्मक रहेकाले नोक्सानी बढेको हो ।
असोज मसान्तमा फण्डको जम्मा खर्च रू. ७९ लाख १५ हजार रहेकोमा कात्तिक मसान्तमा बढेर रू. १ करोड भन्दा बढी पुगेको छ । फण्डको न्याभ भने असोज महीनाको तुलनामा कात्तिक महीनामा घटेको छ । असोज मसान्तमा १० रुपैयाँ ५४ पैसा रहेकोमा कात्तिक मसान्तमा १० रुपैयाँ ४९ पैसा कायम भएको हो ।
फण्डले कात्तिक मसान्तमा सूचीकृत शेयरमा रू. १ अर्ब ७८ लाख लगानी गरेको छ । यो लगानी असोज मसान्तमा रू. १ अर्ब १ करोड भन्दा बढी थियो । यस आधारमा फण्डले सूचीकृत शेयरमा लगानी असोज महीनाको तुलनामा कात्तिक महीनामा केही घटाएको छ ।
