काठमाडौं । सानिमा क्यापिटल लिमिटेड योजना व्यवस्थापक रहेको सानिमा इक्विटी फन्ड परिपक्व भएसँगै खारेजी प्रक्रिया सम्पन्न भएको छ । योजना व्यवस्थापकले योजना खारेजी प्रक्रिया सम्पन्न गरी प्रतिफल समेत लगानी रकम फिर्ता गरेको हो । गत पुस १० गतेदेखि परिपक्व भएको यस योजनाले आफ्नो स्वामित्वमा रहेका धितोपत्रहरू विक्री गरी नगदमा परिणत गरेपछि फिर्ता भुक्तानी कार्य शुरू भएको हो । 

योजनाको अवधिभरमा पूँजीगत लाभ तथा विगतका आर्थिक वर्षहरूमा वितरण गरिएको प्रतिफल समेत इकाई कुल प्रतिफल रकम १२ रुपैयाँ २७ पैसा रहेको छ । प्रारम्भिक इकाईधनीहरूले १० रुपैयाँ प्रति इकाईमा लगानी गरेको हुनाले लगानीको औसत वार्षिक प्रतिफल १७ रुपैयाँ ५२ पैसा रहेको जानकारी समेत योजना व्यवस्थापकले दिएको छ । चैत १९ गते योजनाको लेखापरीक्षण भएको वित्तीय विवरणको आधारमा कायम भएको अन्तिम प्रति इकाई खुद सम्पत्ति मूल्य ११ रुपैयाँ ७७ पैसामा प्रचलित बमोजिम कर कट्टा गरी इकाई धनीहरूको बैंक खातामा चैत २२ गतेदेखि प्रतिफल समेत रकम फिर्ता गर्न शुरू गरिएको हो ।

सात वर्षे अवधिको बन्दमुखी प्रकृतिको यस योजनाको १३ करोड इकाई दोस्रो बजारमा सूचीकृत रहेको थियो । योजना परिपक्व भएसँगै खारेजी प्रकृयामा गएकाले सूचीकरण समेत खारेज भैसकेको छ । यस योजना सञ्चालनका लागि प्रति इकाई १० रुपैयाँ अंकित मूल्यमा १३ करोड इकाई विक्री गरिएको थियो । नेपाल धितोपत्र बोर्डले यस योजना सञ्चालनका लागि योजना व्यवस्थापकलाई २०७४ साल कात्तिक २७ गते अनुमति दिएको थियो । 

२०७४ साल पुस ११ गते योजना सञ्चालनका लागि विक्री गरिएको इकाई बाँडफाँट गरिएको थियो । यस योजनाले आर्थिक वर्ष ०७५/७६ देखिनै प्रतिफल वितरण गरेको देखिन्छ । आर्थिक वर्ष ०७५/७६ मा १० प्रतिशत, ०७६/७७ मा ७ प्रतिशत, ०७७/७८ मा ३३ प्रतिशत, ०७८/७९ मा २२ प्रतिशत, ०७९/८० मा १८ प्रतिशत र ०८०/८१ मा १५ प्रतिशत प्रतिफल वितरण गरेको थियो ।