काठमाडौं । तीन कम्पनीको लाभांश सुरक्षित गर्ने अन्तिम दिन रहेको छ । साधारण सभा तथा लाभांश वितरण प्रयोजनको लागि हाथवे इन्भेष्टमेन्ट, तारागाउँ रिजेन्सी होटल र फर्स्ट माइक्रोफाइनान्सले भोलि अर्थात् पुस १२ गते बुक क्लोज गर्दैछन् ।
यस अनुसार आजसम्म नेप्सेमा कारोबार भई कायम शेयरधनीहरूले यी कम्पनीहरूको साधारण सभामा सहभागिता जनाउन तथा यी कम्पनीहरूले वितरण गर्ने लाभांश प्राप्त गर्न सक्नेछन् ।
हाथवेले हाल कायम चुक्ता पूँजीको १० दशमलव ५२६ प्रतिशत लाभांश वितरण गर्ने घोषणा गरेको हो । कुल लाभांशमध्ये १० प्रतिशत बोनस शेयर छ भने शून्य दशमलव ५२६ प्रतिशत कर प्रयोजनार्थ नगद लाभांश छ ।
यो प्रस्ताव पारित गर्न कम्पनीले पुस २६ गते लैनचौर ब्याङ्क्वेट, लैनचौर, काठमाडौँमा १५ औं वार्षिक साधारण सभा बोलाएको छ । सो सभा बिहान १० बजे शुरु हुनेछ ।
त्यसैगरी, फर्स्ट माइक्रोफाइनान्सले पुस २८ गते आम्रपाली ब्याक्वेट, भाटभटेनी, काठमाडौंमा चौधौं वार्षिक साधारण सभा बोलाएको छ । सो सभा बिहान १० बजे शुरु हुनेछ ।
सभाले हाल कायम चुक्ता पूँजीको ७ दशमलव ५ प्रतिशतका दरले बोनस शेयर र सोको कर प्रयोजनार्थ सहित ७ दशमलव ५ प्रतिशतका दरले नगद लाभांश वितरण गर्ने विशेष प्रस्ताव पारित गर्नेछ । साथै, सभाले लघुवित्तको अधिकृत, जारी तथा चुक्ता पूँजी वृद्धि गर्ने, प्रबन्धपत्र तथा नियमावली संशोधन गर्न सञ्चालक समितिलाई अख्तियारी दिने, सञ्चालकहरूको नियुक्ति अनुमोदन गर्ने, लेखापरीक्षक नियुक्त गर्ने लगायतका प्रस्ताव पनि पारित गर्नेछ ।
त्यस्तै तारागाउँ रिजेन्सीले भने पुस २४ गते नेपाल पर्यटन बोर्ड, भृकुटीमण्डप, काठमाडौंमा २७ औं साधारण सभा बोलाएको छ । सो सभा बिहान ११ बजे शुरु हुनेछ ।
सभाले हाल कायम चुक्ता पूँजीको ११ प्रतिशतका दरले नगद लाभांश र ४ प्रतिशतका दरले बोनस शेयर गरी कुल १५ प्रतिशतका दरले लाभांश वितरण गर्ने विशेष प्रस्ताव पारित गर्नेछ । साथै, सभाले प्रबन्धपत्र तथा नियमावली संशोधन, लेखापरीक्षक नियुक्त गर्ने लगायतका प्रस्ताव पनि पारित गर्नेछ ।
