काठमाडौं । अमेरिकी राष्ट्रपति डोनाल्ड ट्रम्पले चुनाव सम्बन्धी नियममा परिवर्तन गरेका छन् । ट्रम्पले मंगलवार यससम्बन्धी कार्यकारी आदेशमा हस्ताक्षर गरेका हुन् ।
आदेशअनुसार अब संघीय चुनावमा मतदानका लागि नागरिकताको प्रमाणपत्र आवश्यक पर्ने भएको छ ।
यस्तै, चुनावको दिनसम्म प्राप्त हुने मतपत्रको मात्रै गन्ती गरिने भएको छ । अब चुनाव समाप्त भइसकेपछि प्राप्त हुने मेल–इन ब्यालटलाई अवैध मानिने व्यवस्था गरिएको छ ।
चुनाव सुरक्षाका लागि उक्त कदम आवश्यक रहेको ट्रम्पले बताएका छन् ।
ट्रम्प अमेरिकाको चुनावी प्रक्रियाबारे लामो समयदेखि आलोचना गर्दै आएका थिए । विशेषगरी सन् २०२० मा सम्पन्न राष्ट्रपतिको चुनावमा जो बाइडेनसँगको पराजयपछि उनले चुनावमा धाँधली र धोखाधडीको आरोप लगाएका थिए । ट्रम्पले खासगरी पुरुष मतदाताबाट धोखाधडी हुने आरोप लगाउँदै आएका थिए ।
नयाँ कार्यकारी आदेश जारी भएपछि ट्रम्प प्रशासनले मतदाता सूची सार्वजनिक गर्न र चुनाव अपराधबारे मुद्दा दर्ता गर्नका लागि संघसँग मिलेर काम गर्न राज्यहरूलाई आह्वान गरेका छन् । राज्यले उक्त आदेश पालना नगरे संघीय वित्त पोषण रोक्ने ट्रम्प प्रशासनको चेतावनी छ ।
ट्रम्पको यो आदेशलाई विभिन्न राज्यहरूले अदालतमा चुनौती दिने तयारी गरेका छन् ।
अमेरिकामा सबै राज्यका मतदानका नियम एकरूपता छैन । टेक्सास, जर्जियालगायत राज्यहरूमा मतदान गर्नका परिचयपत्र ड्राइभिङ लाइसेन्स, पासपोर्ट) देखाउनुपर्छ ।
क्यालिफोर्निया, न्युयोर्कलगायत राज्यहरूमा भने नाम, ठेगाना बताएर वा बिजुलीको बिलजस्ता साधारण प्रमाण देखाएर मतदान गर्न सकिन्छ । एजेन्सीको सहयोगमा
