काठमाडौं । धितोपत्र दोस्रो बजारको समग्र कारोबार मापक नेप्से परिसूचक २ हजार ७०० विन्दुमा उक्लिएको छ । अघिल्लो कारोबार दिनको तुलनामा बुधवार नेप्से परिसूचक शून्य दशमलव ८९ प्रतिशत अर्थात २३ दशमलव ८६ अंक बढेको हो । यस दिन १६६ कम्पनीको धितोपत्र मूल्य बढेको छ भने ७८ कम्पनीको धितोपत्र मूल्य घटेको छ । 

बजार बढ्दा दुई कम्पनीको शेयरमूल्य सर्किट लेभलमा बढेको छ । सेन्ट्रल फाइनान्सको शेयरमूल्य यो दिन १० प्रतिशत बढेको हो भने विशाल बजार कम्पनीको शेयरमूल्य ९ ददशमलव ९६ प्रतिशत बढेको हो ।

सेन्ट्रल फाइनान्सको शेयरमूल्य यस दिन प्रतिकित्ता ५५ रुपैयाँ ७८ पैसाले बढेर अन्तिम मूल्य ६१३ रुपैयाँ ६० पैसा कायम भएको छ । त्यस्तै विशाल बजार कम्पनीको शेयरमूल्य प्रतिकित्ता ५८० रुपैयाँले बढेर अन्तिम मूल्य ६ हजार ४०३ रुपैयाँ ५ पैसा कायम भएको छ । बजार बढ्दा बोटलर्स नेपाल बालाजुको शेयरमूल्य भने १० प्रतिशत घटेको छ । यो दिन बोटलर्स नेपाल बालाजुको शेयरमूल्य प्रतिकित्ता १ हजार ९५३ रुपैयाँ ३० पैसाले घटेर अन्तिम मूल्य १७ हजार ५७९ रुपैयाँ ८० पैसा कायम भएको छ । 

नेप्से परिसूचक बढेपनि बुधवार कारोबार रकम भने घटेको छ । अघिल्लो कारोबार दिन ५ अर्ब ७९ करोड ७७ लाख रुपैयाँभन्दा बढीको १ करोड ६ लाखभन्दा बढी कित्ता धितोपत्र कारोबार भएकोमा बुधवार ५ अर्ब ४४ करोड ४४ लाख रुपैयाँभन्दा बढीको १ करोड ४ लाखभन्दा बढी कित्ता धितोपत्र कारोबार भएको हो । ब्रोकरहरूले लगानीकर्ता उत्साहित भएसँगै बजारमा सकारात्मक प्रभाव देखिएको बताएका छन् । धितोपत्र दोस्रो बजार सञ्चालक नेप्सेमा प्रमुख कार्यकारी अधिकृत नियुक्तीको टुङ्गो लागेसँगै बजार विकास र विस्तारमा नयाँ कामको थालनी हुने अपेक्षा लगानीकर्तामा रहेको ब्रोकरहरूको बुझाई छ ।

बुधबार कुल कारोबारमा सर्वाधिक हिस्सा सिइडिबी होल्डिङ्स लिमिटेडले ओगटेको छ । यस कम्पनीको ३६ करोड ५५ लाख रुपैयाँभन्दा बढीको शेयर कारोबार भएको हो । सर्वाधिक रकमको शेयर कारोबार भएको कम्पनीको शेयरमूल्य ३ दशमलव १५ प्रतिशत अर्थात प्रतिकित्ता ७४ रुपैयाँ ९४ पैसा बढेर अन्तिम मूल्य २ हजार ४५५ रुपैयाँ कायम भएको हो । 

बढेको बजारमा कुल बजार पूँजीकरण पनि अघिल्लो कारोबार दिन ४४ खर्ब ४३ अर्ब ८२ करोड रुपैयाँभन्दा बढी कायम भएकोमा बुधवार बढेर ४४ खर्ब ८३ अर्ब ४६ करोड रुपैयाँभन्दा बढी कायम भएको हो । यो दिन उत्पादन तथा प्रशोधन समूहको परिसूचक १ दशमलव ४७ प्रतिशत घटेको छ भने निर्जीवन बीमाको शून्य दशमलव २६ प्रतिशत घटेको छ । यी वाहेक अन्य समूहको परिसूचक भने बढेका छन् । 

बैंकिङको शून्य दशमलव ५१ प्रतिशत, विकास बैंकको शून्य दशमलव ३० प्रतिशत, वित्तको ३ दशमलव १२ प्रतिशत, होटल तथा पर्यटनको शून्य दशमलव ५९ प्रतिशत, जलविद्युतको शून्य दशमलव ४२ प्रतिशत, लगानीको १ दशमलव ३७ प्रतिशत, लघुवित्तको शून्य दशमलव १७ प्रतिशत, म्युचुअल फण्डको शून्य दशमलव ६९ प्रतिशत, अन्यको शून्य दशमलव ३५ प्रतिशत र व्यापारिकको ९ दशमलव ४४ प्रतिशत परिसूचक बढेको हो । यस दिन पनि व्यापारिक समूहका लगानीकर्ताले सर्वाधिक कमाएका छन् ।