काठमाडौं । साताको अन्तिम कारोबार दिन बिहीबार नेप्से स्थिर जस्तै बनेको छ । यो दिन अघिल्लो कारोबार दिनभन्दा नेप्से परिसूचक २ दशमलव ८१ अंकले मात्र माथि उक्लिएको हो । बिहीवारको कारोबारमा २ हजार ७३२ दशमलव ८५ विन्दुमा पुगेको नेप्से २ हजार ७०० दशमलव २३ विन्दुसम्म झरेको थियो । 

यो दिनको कारोबारलाई हेर्दा तत्काल २ हजार ७०० भन्दा तल बजार नझर्ने संकेत गर्दछ । लगानीकर्ताहरू उत्साहित रहेको अवस्थामा आगामी दिनमा बजार केही माथि जाने आकलन गरिएका छन् ।

यतिबेला वित्तीय प्रणालीमा रहेको पर्याप्त तरलता धितोपत्र बजारमा भित्रिने सम्भावनालाई पनि जानकारहरूले औँल्याइरहेका छन् । नेपाल राष्ट्र बैंकमा नयाँ गभर्नर नियुक्तिपछि लगानीकर्ताले बजारप्रति निर्णय लिने तर्क पनि एक थरि जानकारहरूको देखिन्छ । बिहीवारको कारोबार १५१ कम्पनीको धितोपत्र मूल्य घटेको छ भने ९३ कम्पनीको बढेको छ । 

ग्रीन भेञ्चर्स लिमिटेडको शेयरमूल्य ९ दशमलव ९९ प्रतिशत बढेर प्रतिकित्ता ५०५ रुपैयाँ २० पैसा कायम भएको छ । यस दिन उपकार लघुवित्तको शेयरमूल्य सर्वाधिक ७ दशमलव ८५ प्रतिशत घटेर अन्तिम मूल्य ३ हजार ३०१ रुपैयाँ ६ पैसा कायम भएको छ ।

बिहीवार नेप्से स्थिर अवस्थामा रहेपनि कारोबार रकम भने बढेको छ । बुधवार ५ अर्ब ४४ करोड ४४ लाख रुपैयाँभन्दा बढीको १ करोड ४ लाख ४२ हजारभन्दा बढी कित्ता धितोपत्र कारोबार भएकोमा बिहीवार ७ अर्ब ८४ करोड ४६ लाख रुपैयाँभन्दा बढीको १ करोड ५५ लाख २ हजारभन्दा बढी कित्ता धितोपत्र कारोबार भएको हो ।

कुल कारोबार रकममा बुधवार सर्वाधिक हिस्सा गुमाएको हिमालयन रिइन्स्योरेन्सले बिहीवार भने सर्वाधिक हिस्सा कायम गरेको छ । हिमालयन रिइन्स्योरेन्सको यस दिन ७२ करोड ३२ लाख रुपैयाँभन्दा बढीको शेयर कारोबार भएको देखिन्छ । नेपाल पुनर्बीमा कम्पनीको शेयर कारोबार भने सर्वाधिक दोस्रो नम्बरमा रहेको छ । नेपाल पुनर्बीमा कम्पनीको भने यस दिन ५५ करोड ९९ लाख रुपैयाँभन्दा बढीको शेयर कारोबार भएको हो ।

बिहीवार कुल बजार पूँजीकरण ४४ खर्ब ८९ अर्ब ३ करोड ५२ लाख रुपैयाँ कायम भएको छ । अघिल्लो दिनको तुलनामा यो दिन कुल बजार पूँजीकरण ५ अर्ब ५७ करोड रुपैयाँभन्दा बढीले मात्र बृद्धि भएको हो । अघिल्लो कारोबार दिन कुल बजार पूँजीकरण ४४ खर्ब ८३ अर्ब ४६ करोड ३३ लाख रुपैयाँ थियो । 

यस दिन अन्य समूहका लगानीकर्ताले सर्वाधिक कमाएका छन् । अन्य समूहको परिसूचक १ दशमलव ४५ प्रतिशत बढेको हो । योसँगै बैंकिङको शून्य दशमलव ९६ प्रतिशत, जलविद्युतको शून्य दशमलव शून्य ३ प्रतिशत र निर्जीवन बीमाको शून्य दशमल ५९ प्रतिशत परिसूचक बढेको छ । 

यी वाहेक यो दिन व्यापारिकको १ दशमलव ६६ प्रतिशत, म्यचुअल फण्डको शून्य दशमलव २४ प्रतिशत, लघुवित्तको शून्य दशमलव ३७ प्रतिशत, उत्पादन तथा प्रशोधनको शून्य दशमलव ९८ प्रतिशत, जीवन बीमाको शून्य दशमलव ६६ प्रतिशत, लगानीको शून्य दशमलव शून्य ३ प्रतिशत, होटल तथा पर्यटनको शून्य दशमलव १२ प्रतिशत, वित्तको १ दशमलव ५९ प्रतिशत र विकास बैकको शून्य दशमलव १७ प्रतिशत परिसूचक घटेको छ ।