काठमाडौं । प्रभु स्टील्स एण्ड हाईड्रो इन्भेष्टमेण्ट कम्पनी लिमिटेडले अवितरित हकप्रद शेयर खरीद गर्ने अवधि थप गरेको छ । प्रतिकित्ता ६० रुपैयाँ मूल्य तोकेर विक्रीमा आएको यी शेयर खरीदका लागि कम्पनीले वैशाख ५ गतेसम्मको अवधि थप गरेको हो ।

यही चैत्र १५ गते कम्पनीको कार्यालय रहेको काठमाडौं तिनकुने क्षेत्रमा भएको आन्दोलन तथा त्यसबाट सिर्जित विषम परिस्थितिको कारण कम्पनीको कार्यालमा उपस्थित हुन असुरक्षित महसुस भएको भन्ने शेयरधनीहरूको गुनासो आए पश्चात् कम्पनीले हकप्रद शेयर लिलामीको म्याद थपेको जनाएको छ ।
कम्पनीले चैत ६ गतेदेखि २० गतेसम्म अवितरित १३ लाख १७ हजार ३० कित्ता हकप्रद शेयर लिलामीमा ल्याएको थियो ।  कम्पनीले माघ ६ गतेसम्म कायम संस्थापक शेयरधनीहरूका लागि शतप्रतिशत हकप्रद शेयर गत माघमा जारी गरेको थियो । सो अवधिमा विक्री नभएको उल्लेखित कित्ता शेयर लिलामीमा विक्री गर्न लागेको हो । यी शेयर खरीदका लागि अन्य व्यक्ति तथा संस्थाहरूले आवेदन दिन सक्नेछन् ।

इच्छुक खरीदकर्ताहरूले तोकिएको अवधिभित्र तोकिएको मूल्य वा सोभन्दा बढी मूल्य अंकित गरी बोलपत्र पेश गर्नुपर्नेछ । लिलामीको शेयरमा आवेदन दिँदा प्रभु स्टील्स कम्पनीको रजिष्टर्ड कार्यालय का.म.न.पा. ३२, तिनकुने, काठमाडौं स्थित कार्यालयमा नै दिनुपर्ने व्यहोरा यस अघिकै सूचनामा उल्लेख गरेको थियो । ।