काठमाडौं । एनआईसी एशिया बैंक लिमिटेडले आफ्नो स्वामित्वमा रहेका चार कम्पनीको २ लाख ५९ हजार ६० कित्ता संस्थापक शेयर माघ २९ गतेदेखि सर्वसाधारणमा जारी गरेको छ । कम्पनीले आफ्नो स्वामित्वमा रहेको नागरिक लगानीकोषको ५० हजार कित्ता, सूर्योदय वोमी लघुवित्तको ५९ हजार ६० कित्ता, सूर्यज्योति लाइफ इन्स्योरेन्सको ५० हजार कित्ता र नेपाल इन्फ्रास्ट्रक्चर बैंकको १ लाख कित्ता संस्थापक शेयर सर्वसाधारणमा विक्री खुला गरेको हो ।

यी शेयर विक्री प्रक्रिया अनुसार पहिलो चरणमा विद्यमान संस्थापक शेयरधनीहरुलाई प्राथमिकता दिनुपर्ने व्यवस्था बमोजिम यस अघि विद्यमान संस्थापक शेयरधनीहरुमा यी शेयर विक्री खुला गरिसकिएको छ । विद्यमान संस्थापक शेयरधनीहरुमा विक्री नभएपछि दोस्रो चरणमा अन्य व्यक्ति तथा संस्थाहरुमा यी शेयर विक्रीमा आएको हो ।

इच्छुक खरीदकर्ताहरुले फागुन ६ गतेभित्र यी शेयर खरीदका लागि गोप्यशिलबन्दी बोलपत्र पेश गर्नुपर्नेछ । यी शेयरको मूल्य तोकिएको छ । नागरिक लगानीकोषको शेयरको मूल्य प्रतिकित्ता ६९० रुपैयाँ, सूर्योदय वोमी लघुवित्तको प्रतिकित्ता २७३ रुपैयाँ, सूर्यज्योति लाइफ इन्स्योरेन्सको प्रतिकित्ता १६५ रुपैयाँ र नेपाल इन्फ्रास्ट्रक्चरको प्रतिकित्ता १०५ रुपैयाँ मूल्य तोकेर विक्रीमा ल्याइएको हो । तोकिएको मूल्य वा सोभन्दा बढी मूल्य अंकित गरी प्रत्येक कम्पनीका लागि छुट्टाछुट्टै आवेदन दिनुपर्नेछ ।

नागरिक लगानीकोषको शेयरका लागि न्यूनतम १० हजार कित्ता र बाँकी कम्पनीको शेयरका लागि न्यूनतम  ५ हजार कित्ता देखि अधिकतम सम्पूर्ण कित्ता माग गर्नुपर्नेछ । यी शेयर बाँडफाँटमा प्राप्त गर्ने शेयरधनीहरु माघ २९ गतेपछि यी कम्पनीहरुद्वारा घोषणा हुने लाभांश तथा हकप्रदका लागि समेत योग्य हुने जानकारी कम्पनीले दिएको छ । यी शेयर विक्री प्रबन्धकमा एनआईसी एशिया क्यापिटल लिमिटेड रहेको छ । विक्री प्रबन्धकसँगै एनआईसी एशिया बैंक लिमिटेडको कर्पोरेट कार्यालय थापाथली, काठमाडौं शाखा कार्यालयहरु विराटनगर, वीरगञ्ज, पोखरी, बुटवल, धनगढी र सुर्खेतबाट आवेदन प्राप्त गर्न र बुझाउन सकिने व्यवस्था छ ।