काठमाडौं । पियोर इनर्जी नेपाल लिमिटेडले चैत २८ गतेदेखि निष्कासन गरेको आईपीओ खरीदका लागि अन्तिम दिनसम्म १९ लाख ३६ हजार ५३ जनाले आवेदन दिएका छन् ।

सिडिएस एण्ड क्लियरिङ लिमिटेडले दिएको जानकारी अनुसार यी आवेदकहरूबाट २ करोड २७ लाख ४२ हजार ६५० कित्ता शेयर खरीद माग भएको हो । जुन मागभन्दा १९ गुणा बढी हो ।  मागभन्दा बढी आवेदन परेकाले कम्पनीले छिटो अवधि वैशाख २ गतेसम्म मात्र आईपीओ निष्कासन गरेको हो । कम्पनीले सर्वसाधारणका लागि आईपीओ निष्कासन गर्नुअघि आयोजना प्रभावित स्थानीय र वैदेशिक रोजगारीमा रहेका नेपालीका लागि आईपीओ निष्कासन तथा बाँडफाँट गरी दोस्रो चरणमा सर्वसाधारणका लागि आईपीओ निष्कासन गरेको हो ।

आम सर्वसाधारणका लागि कम्पनीले ११ लाख ९५ हजार २०० कित्ता आईपीओ सार्वजनिक निष्कासनमा ल्याएको हो । कम्पनीले पहिलो चरणको आईपीओ फागुन २० गतेदेखि चैत ५ गतेसम्म निष्कासन गरी चैत १५ गते बाँडफाँट गरेको थियो । कम्पनीले १ लाख ६० हजार कित्ता आईपीओ आयोजना प्रभावित क्षेत्र बाँके जिल्लाका अयोजना प्रभावित स्थानीय बासिन्दाहरूका लागि र१ लाख ४४ हजार कित्ता आईपीओ वैदेशिक रोजगार गरी रहेका नेपालीहरूका लागि बाँडफाँट गरेको हो ।

यीबाहेक कम्पनीले कर्मचारीहरूका लागि २८ हजार ८०० कित्ता र सामूहिक लगानीकोषका लागि ७२ हजार कित्ता आईपीओ समेत बाँडफाँट गरिसकेको छ । आईपीओ खरीदका लागि न्यूनतम १० कित्तादेखि अधिकतममा १ लाख कित्तासम्म माग गर्न सकिने व्यवस्था छ । कम्पनीको आईपीओ निष्कासन तथा विक्री प्रबन्धकमा नबिल इन्भेष्टमेन्ट बैंकिङ्ग लिमिटेड रहेको छ ।

यो कम्पनी सौर्य ऊर्जा उत्पादक कम्पनी हो । यस कम्पनीले दुई सौर्य विद्युत आयोजना निर्माण सम्पन्न गरी व्यापारिक उत्पादन गर्दै आएको छ । १० मेगावाट क्षमताको सौर्य पि.भि विद्युत आयोजना ब्लक–१ बाट २०८० पुस ११ गतेदेखि र १० मेगावाट सौर्य पि.भि विद्युत आयोजना ब्लक –२ बाट २०८० वैशाख १८ गतेबाट व्यापारिक उत्पादन शुरू गरिएको हो ।

८० करोड रुपैयाँ अधिकृत पूँजी रहेको कम्पनीको जारी पूँजी पनि ८० करोड रुपैयाँ नै छ । हाल कम्पनीको चुक्तापूँजी ६४ करोड रुपैयाँ छ । आईपीओ निष्कासन तथा बाँडफाँडपछि कम्पनीको चुक्तापूँजी ८० करोड रुपैयाँ कायम हुनेछ ।

यो कम्पनी हाल सञ्चित नोक्सानीमै रहेको छ । अघिल्ला तीन आर्थिक वर्षको वास्तविक वित्तीय विवरणलाई हेर्दा आर्थिक वर्ष ०७८|७९ मा १९ लाख ६ हजार रुपैयाँ, ०७९|८० मा ४१ लाख ३७ हजार रुपैयाँ र ०८०/८१ मा २ करोड २६ लाख ९४ हजार रुपैयाँभन्दा बढी कम्पनी सञ्चित नोक्सानीमा रहेको देखिन्छ ।

चालू आर्थिक वर्षको पुस मसान्तसम्मको अपरिस्कृत वित्तीय विवरण अनुसार भने कम्पनी २ करोड ३ लाख रुपैयाँभन्दा बढी सञ्चित नोक्सानीमा रहेको छ । चालू आर्थिक वर्षभित्र सञ्चित नोक्सानी सुधारेर १ करोड १४ लाख रुपैयाँभन्दा बढी सञ्चित नाफा गर्ने प्रक्षेपण कम्पनीको छ ।

पछिल्लो वास्तविक वित्तीय विवरण अनुसार कम्पनीको प्रतिशेयर नेटवर्थ ९६ रुपैयाँ ४५ पैसा छ भने २ रुपैयाँ ७५ पैसा प्रतिशेयर नोक्सानीमा छ ।