काठमाडौं । असोज दोस्रो साता आएको बाढीपहिरोले पुर्याएको विनाशको क्षतिपूर्तिबापत १० अर्ब रूपैयाँभन्दा बढीको दाबी परेपछि चालू आर्थिक वर्षको पहिलो त्रैमासमा निर्जीवन बीमा कम्पनीहरूको नाफा प्रभावित भएको छ । देशका १४ निर्जीवन बीमा कम्पनीले सार्वजनिक गरेको चालू आर्थिक वर्ष (आव) को पहिलो त्रैमासको वित्तीय विवरणअनुसार उनीहरूको कुल नाफा यो वर्ष ८६ प्रतिशतले घटेको छ ।
गत आवको पहिलो त्रैमासमा १४ निर्जीवन बीमा कम्पनीको कुल नाफा १ अर्ब १९ करोड भएकोमा चालू आवको सोही अवधिमा १६ करोड ६५ लाख रुपैयाँमा सीमित भएको छ । दि ओरिएण्टल इन्स्योरेन्स, नेशनल इन्स्योरेन्स, सगरमाथा लुम्बिनी इन्स्योरेन्स र युनाइटेड अजोड इन्स्योरेन्स कम्पनीले घाटा बेहोरेका छन् । नाफामा रहेका १० बीमा कम्पनीमध्ये नेको इन्स्योरेन्स, सिद्धार्थ प्रिमियर इन्स्योरेन्स, एनएलजी इन्स्योरेन्स र नेपाल इन्स्योरेन्सको नाफा घटेको छ । 
नेपाल इन्स्योरेन्सको नाफा सबैभन्दा बढी ९२ दशमलव ८८ प्रतिशतले घटेको छ भने दोस्रोमा सिद्धार्थ प्रिमियरको ५४ दशमलव ३० प्रतिशतले घटेको छ । अन्य दुईको नाफामा केही कम गिरावट आएको छ । राष्ट्रिय बीमा कम्पनी, शिखर इन्स्योरेन्स, हिमालयन एभरेष्ट इन्स्योरेन्स, आइजिआई पु्रडेन्सियल इन्स्योरेन्स, प्रभु इन्स्योरेन्स र सानिमा जिआईसी इन्स्योरेन्सले नाफा बढाएका छन् ।
‘बाढीपहिरोले पुर्याएको क्षतिको ठूलो दाबी परेका कारण सबैजसो निर्जीवन बीमा कम्पनीको नाफा प्रभावित भएको छ,’ एनएलजी इन्स्योरेन्स कम्पनीका प्रमुख कार्यकारी अधिकृत सुनिलवल्लभ पन्तले आर्थिक अभियानसँग भने, ‘हाम्रो पनि नाफा घट्नुको पछाडि यही मुख्य कारण हो ।’ नेपाल बीमा प्राधिकरणको कात्तिक २० गतेसम्मको विवरणअनुसार बाढीपहिरो तथा प्राकृतिक प्रकोपको क्षतिबाट बीमा कम्पनीहरूमा १० अर्ब ५३ करोड रुपैयाँभन्दा बढीको दाबी परेको छ ।
कात्तिक २१ गतेसम्म कम्पनीहरूबाट ४७ करोड ११ लाख रुपैयाँ मात्र भुक्तानी भएको प्राधिकरणले बताएको छ । ‘तर पनि दाबी भइसकेपछि हामीले त्यसअनुसार प्रोभिजनिङ गर्नुपर्छ,’ पन्तले भने, ‘त्यसैले हालसम्मको दाबी भुक्तानी दाबीको तुलनामा न्यून नै भए पनि नाफा प्रभावित भएको छ ।’ आकस्मिक रूपमा ठूलो दाबी परेपछि नाफा प्रभावित भएको उनको भनाइ छ ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणको हालैको क्षतिसम्बन्धी प्रतिवेदनअनुसार असोजको बाढीपहिरोबाट ४६ अर्ब ६८ करोड रुपैयाँ बराबरको आर्थिक क्षति भएको छ । ‘जलवायु परिवर्तनको परिप्रेक्ष्यमा नेपालमा प्राकृतिक विपद्को जोखिम बढ्दै गएको छ,’ पन्तले भने, ‘त्यसैले बीमा कम्पनीमाथि दाबी धेरै पर्ने जोखिम पनि बढ्दै गएको छ ।’
