काठमाडौं । टाइम फर्मास्युटिकल्स लिमिटेडले बुक विल्डिङ विधिबाट आईपीओ निष्कासन गर्ने तयारी गरेको छ । फागुन २५ गते बसेको कम्पनीको सञ्चालक समितिको बैठकले आईपीओ निष्कासन सहित अन्य विविध प्रस्ताव पारितका लागि वैशाख ११ गते विशेष साधारण सभा गर्ने निर्णय गरेको हो । सभा कम्पनीको उद्योग परिसर, गैडाकोट, नवलपरासीमा अपरान्ह्र १२ः३० बजे हुनेछ ।

सभाले हालको जारी पूँजी ४२ करोड ९१ लाख ११ हजार ८०० रुपैयाँलाई संशोधन गरी ४६ करोड रुपैयाँ कायम गर्ने प्रस्ताव पारित गर्नेछ । संशोधन गरी कायम हुने जारी पूँजीमध्ये ७९ दशमलव ३४७८ प्रतिशत संस्थापक समूहका लागि र २० दशमलव ६५२१ प्रतिशत सर्वसाधारण समूहका लागि वितरण हुनेछ । सभाले कम्तीमा एक जना महिला सञ्चालक सहित संस्थापकबाट पाँच जना र सर्वसाधारणबाट १ र स्वतन्त्र सञ्चालक १ गरी कुल ७ जनाको सञ्चालक समिति बनाउने प्रस्तावलाई पनि पारित गर्नेछ ।

बुक विल्डिङ विधिबाट आईपीओ निष्कासनको प्रस्ताव अघि सारेको कम्पनीले त्यसको जिम्मेवारी सञ्चालक समितिलाई दिने निर्णय गर्नेछ । कार्यकारी अध्यक्ष , प्रबन्ध सञ्चालक, कम्पनीको व्यवस्थापनको जिम्मेवारी लिने सञ्चालकहरु तथा अन्य सञ्चालकहरुको पारिश्रमिक , भत्ता तथा अन्य सूविधा निर्धारणका सम्बन्धमा पनि सभाले आवश्यक निर्णय गर्नेछ ।