काठमाडौं । अघिल्ला कारोबार दिन निरन्तर घटेको नेप्से परिसूचक सोमवार भने १६ दशमलव ९६ अंकले उकालो लागेको छ । यो दिन नेप्से परिसूचक १ हजार ९०२ दशमलव २७ विन्दुमा बन्द भएको हो । प्रतिशतका हिसाबमा आइतवारको तुलनामा शून्य दशमलव ९० प्रतिशत नेप्से परिसूचक वृद्धि भएको छ ।

यस दिन नेप्से परिसूचकसँगै सेन्सेटिभ इन्डेक्स पनि १ दशमलव ५२ प्रतिशत बढेर ३७२ दशमलव ९३ विन्दुमा पुगेको छ । सोमवार रू. १ अर्ब ३६ करोड ६० लाख बराबरको ४४ लाख ७० हजार ६२५ कित्ता धितोपत्र खरीदविक्री भएको छ । २४५ कम्पनीको २२ हजार ९९३ पटकको कारोबारमा उक्त रकम बराबरको धितोपत्र खरीदविक्री भएको छ ।

कुल कारोबारमा सर्वाधिक हिस्सा नबिल बैंक लिमिटेडले ओगटेको छ । सोमवार नबिल बैंकको सर्वाधिक रू. २१ करोड ३२ लाख ४१ हजार बराबरको २ लाख ६१ हजार ५१९ कित्ता शेयर कारोबार भएको छ । सर्वाधिक रकमको कारोबार भएको नबिल बैंकको शेयर मूल्य भने ३ दशमलव ६६ प्रतिशत अर्थात् प्रतिकित्ता रू. ३१ ले बढेर अन्तिम मूल्य रू. ८१५ कायम भएको छ । 

यस वर्ष नबिल बैंकले गत आर्थिक वर्षको वितरणयोग्य मुनाफाबाट कुल ३० प्रतिशत लाभांश वितरणको प्रस्ताव गरेको छ । बैंकले ३० प्रतिशत लाभांश वितरणको प्रस्ताव गरेको छ । गत वर्षभन्दा कम लाभांश प्रस्ताव गरेको नबिल बैंकको शेयरमा सोमवार विक्री चाप बढ्दा मूल्यमा असर परेको देखिन्छ । 

गत वर्ष ३३ दशमलव ६ प्रतिशत बोनस शेयर र कर प्रयोजन समेतका लागि ४ दशमलव ४ प्रतिशत नगद लाभांश वितरण गरेको बैंकले यस वर्ष कम लाभांश प्रस्ताव गरेसँगै लगानीकर्ता निराश बनेका हुन् । बैंकले विगत दश वर्षमा वितरण गरेको लाभांश प्रस्तावलाई हेर्दा यस वर्ष सबैभन्दा कम लाभांश प्रस्ताव गरेको छ । 

विगत दश वर्षको इतिहासमा यस बैंकले ६५ प्रतिशतसम्म लाभांश वितरण गरेको छ । दुई आर्थिक वर्ष ०६९/७० र ०७०/७१ मा बैंकले कुल ६५ प्रतिशत लाभांश वितरण गरेको थियो । 

सोमवार दुई कम्पनीको शेयर मूल्य १० प्रतिशतले बढेको छ । समीट लघुवित्त वित्तीय संस्था लिमिटेड र सिवाईसी नेपाल लघुवित्तको शेयर मूल्य १० प्रतिशतले बढेको छ । समीट लघुवित्त वित्तीय संस्थाको शेयर मूल्य यो दिन प्रतिकित्ता रू. १०६ ले बढेर अन्तिम मूल्य रू. १ हजार १६६ दशमलव २० पुगेको छ । 

त्यस्तै सिवाईसी नेपाल लघुवित्तको शेयर मूल्य प्रतिकित्ता रू. १८६ दशमलव ८० ले बढेर अन्तिम मूल्य रू. २ हजार ५४ दशमलव ८० पुगेको छ । बढेको बजारमा ग्लोबल आइएमई ब्यालेन्स्ड फण्ड–१ को इकाई मूल्य सर्वाधिक ९ दशमलव ९३ प्रतिशत घटेको छ । यस योजनाको प्रतिइकाई मूल्य रू. शून्य दशमलव ९० ले घटेर अन्तिम इकाई मूल्य रू. ८ दशमलव १६ कायम भएको छ । 

सोमवारको कारोबारमा बैंकिङ समूहको उपसूचक घटेको छ भने बाँकी समूहको बढेको छ । यो दिन ‘अन्य’ समूहको उपसूचक सर्वाधिक ६ दशमलव १४ प्रतिशत बढेको छ । कुल बजार पूँजीकरणमा दोस्रो स्थान ओगटेको नेपाल दूरसञ्चार कम्पनीको शेयर मूल्य सोमवार ७ दशमलव ४६ प्रतिशत अर्थात् प्रतिकित्ता रू. ६४ ले बढेर रू. ९२२ कायम भएको छ । नेपाल दूरसञ्चार कम्पनीको मूल्य वृद्धिले अन्य समूहको उपसूचक सर्वाधिक बढ्न सहयोग मिलेको हो । 

यस दिन सूचीकृत कम्पनीहरूको कुल शेयरको मूल्य अर्थात् कुल बजार पूँजीकरण रू. २७ खर्ब ३९ अर्ब ३९ करोड ५४ लाख कायम भएको छ । आइतवार यो रकम रू. २७ खर्ब १४ अर्ब ९६ करोड ८८ लाख रहेको थियो । सोमवार आइतवारको तुलनामा कुल बजार पूँजीकरण रू. २४ अर्ब ४२ करोड ६५ लाखले वृद्धि भएको छ ।