काठमाडौं । ग्लोबल आइएमई समुन्नत योजना-१ आगामी चैत ११ गते परिपक्व हुँदै छ । २०७२ साल माघ १३ गते सञ्चालनको अनुमति पाएको योजनाको व्यवस्थापक ग्लोबल आइएमई क्यापिटलले योजना खारेजीमा जाने सूचनामार्फत जानकारी गराएको छ ।

योजना व्यवस्थापकका अनुसार सामूहिक लगानी कोष नियमावली, २०६७ मा भएको व्यवस्थाअनुसार योजना खारेजीका लागि नियामक निकाय नेपाल धितोपत्र बोर्डलाई जानकारी गराइसकिएको छ । 

योजना खारेजी प्रक्रियाका लागि चैत ९ गते बिहीवारसम्म कायम इकाईधनीहरूलाई योग्य गराइने जानकारीसमेत योजना व्यवस्थापकले दिएको छ । योजना खारेजीपश्चात् योजनाअन्तर्गतको सम्पत्ति नगदमा परिणत गरी इकाईधनीहरूको स्वामित्वको आधारमा भुक्तानी दिइने जानकारी योजना व्यवस्थापकले गराएको छ ।

यस योजनाका इकाईहरू खरीद गरी हालसम्म पनि आफ्नो इकाई अभौतिकीकरण नगराएका इकाईधनीहरूलाई यथाशीघ्र गराउनसमेत योजना व्यवस्थापकले अनुरोध गरेको छ ।

योजनाले आर्थिक वर्ष ०७६/७७ को मुनाफाबाट ४ प्रतिशत र आर्थिक वर्ष ०७७/७८ को मुनाफाबाट १०० प्रतिशत नगद लाभांश वितरण गरेको थियो । 

माघ मसान्तसम्मको वित्तीय अवस्थालाई हेर्दा योजना रू. २५ करोड ५३ लाखभन्दा बढी नोक्सानीमा रहेको छ । यस अवधिसम्म योजनाको खुद सम्पत्ति रू. १ अर्ब ४ करोडभन्दा बढी छ । योजना सञ्चालनका लागि १० करोड इकाई जारी गरिएको थियो ।