काठमाडौं । पछिल्लो ११ वर्षदेखि वार्षिक साधारणसभा नगरेको र ५ वर्षदेखि लेखापरीक्षण पनि नगराएको एक कम्पनीको बजार पूँजीकरण अहिले सर्वाधिक रहेको छ । धितोपत्रको दोस्रो बजारमा सूचीकृत उक्त कम्पनी हो– विशाल बजार  कम्पनी लिमिटेड । 

यसको बजार पूँजीकरण बुधवार २ खर्ब ३३ अर्ब ८६ करोड ३२ लाख रुपैयाँ कायम छ, जुन नेपाल स्टक एक्स्चेन्ज (नेप्से) मा सूचीकृत कम्पनीमध्ये सर्वाधिक हो । यसअघि सर्वाधिक पूँजीकरण भएको कम्पनी नेपाल टेलिकम (नेपाल दूरसञ्चार कम्पनी लिमिटेड)को पूँजीकरण भने बुधवार १ खर्ब ६५ अर्ब २ करोड ४० लाख रुपैयाँ कायम भएको छ । धितोपत्रको दोस्रो बजारमा नेपाल टेलिकमको १८ करोड कित्ता शेयर सूचीकृत छ ।

बुधवार धितोपत्र दोस्रो बजारको कुल बजार पूँजीकरण ४४ खर्ब २१ अर्ब १८ करोड १० लाख १७ हजार रुपैयाँ कायम भएको छ । विशाल बजार कम्पनीको शेयरमा लगानीकर्ताको आकर्षण बढेकाले नै शेयर मूल्य वृद्धि भई पूँजीकरण बढेको नेप्सेका एक उच्च अधिकारीले बताए । उक्त कम्पनीको शेयर मूल्य बुधवार बजार बन्द हुँदा प्रतिकित्ता ५ हजार ८३२ रुपैयाँ कायम भएको छ । धितोपत्रको दोस्रो बजारमा विशाल बजार कम्पनीको ४ करोड १ लाख कित्ता शेयर सूचीकृत छ । 

कम्पनीको कुल शेयरमध्ये ३ करोड ९६ लाख ८१ हजार ३३ कित्ता संस्थापकसँग र ४ लाख १८ हजार ९६७ कित्ता सर्वसाधारण शेयरधनीसँग छ । कम्पनीको शेयर संरचनामा संस्थापकतर्फ ९८ दशमलव ९६ प्रतिशत र सर्वसाधारणतर्फ १ दशमलव शून्य ४ प्रतिशत रहेको नेप्सेले जानकारी दिएको छ । ‘सर्वसाधारणतर्फ थोरै कित्तामात्र शेयर भएको र माग धेरै हुने भएकोले यसको भाउ बढेको हो,’ नेप्सेका ती अधिकारीले भने । 

यस कम्पनीले आर्थिक वर्ष (आव) २०७७/७८ को दोस्रो त्रैमाससम्म वित्तीय विवरण सार्वजनिक गरे पनि त्यसपछि गरेको छैन । पछिल्लो वित्तीय विवरण नै थाहा नभएको कम्पनीको शेयर मूल्य बढी सर्वाधिक बजार पूँजीकरण कायम हुनु अस्वाभाविक रहेको सरोकारवाला बताउँछन् ।

‘लामो समयदेखि वित्तीय विवरण नै सार्वजनिक नगरेको कम्पनीको शेयर मूल्य अस्वाभाविक वृद्धि हुनुमा चलखेल जिम्मेवार हुनसक्छ,’ पुराना लगानीकर्ता डम्बरुवल्लभ घिमिरे भन्छन्, ‘सर्वसाधारणतर्फ थोरै मात्र स्वामित्व रहेको कम्पनीको शेयर मूल्यमा भएको उतारचढावमाथि नियामक निकाय र बजार सञ्चालकले ध्यानपूर्वक अनुसन्धान थाल्नुपर्छ । नत्र लगानीकर्ता जोखिममा पर्ने सम्भावना हुन्छ ।’

यस कम्पनीले २०७० साल चैत १४ गते आव २०६९/७० सम्मको ३३औं वार्षिक साधारणसभा सम्पन्न गरेको थियो । त्यसपछि साधारणसभा गर्न सकेको छैन । कम्पनीले गत साउनमा दुई आव २०७०/७१ र २०७१/७२ को वार्षिक साधारणसभा आह्वान गरे पनि शेयरधनीले विवाद निकालेपछि रोकिएको थियो । कम्पनीले आव २०७५/७६ सम्मको वार्षिक लेखापरीक्षण सम्पन्न गरिसकेको सञ्चालक समिति सदस्य राधा पोखरेलले जानकारी दिइन् । 

लामो समयदेखिको वार्षिक लेखापरीक्षण बाँकी रहेको अवस्थामा २०७६/७७ देखि २०८०/८१ सम्मको लेखापरीक्षण सम्पन्न गरी चालू आवभित्र साधारणसभा सम्पन्न गर्ने गरी काम भइरहेको समेत पोखरेलले जानकारी दिइन् । 

कम्पनीले आफ्नो अपरिष्कृत वित्तीय विवरण पछिल्लोपटक २०७७ साल पुस २० गते सार्वजनिक गरेको थियो । उक्त अवधिमा कम्पनीले आव २०७७/७८ को दोस्रो त्रैमाससम्मको वित्तीय विवरण सार्वजनिक गरेको थियो । त्यसपछिका अपरिष्कृत वित्तीय विवरण पनि कम्पनीले सार्वजनिक गरेको छैन ।