काठमाडौं । चालू आर्थिक वर्षको दोस्रो त्रैमाससम्म एनआईसी एशिया बैंक लिमिटेको प्रतिशेयर आम्दानी २ रुपैयाँ ४ पैसामा खुम्चिएको छ । गत वर्ष यस अवधिसम्म २५ रुपैयाँ ५९ पैसा प्रतिशेयर आम्दानीमा रहेको कम्पनीको यस वर्ष प्रतिशेयर आम्दानी साढे २३ प्रतिशत कम भएको हो । 

दोस्रो त्रैमाससम्म कम्पनीको खुद नाफा भने १५ करोड १७ लाख रुपैयाँभन्दा बढी भएको छ । गत वर्ष यस अवधिसम्म कम्पनीको खुद नाफा १ अर्ब ९० करोड रुपैयाँभन्दा बढी थियो । यस वर्ष कम्पनीको खुद नाफा ९२ प्रतिशतले घटेको हो । यस वर्ष कम्पनीले इम्पेरमेन्ट चार्ज शिर्षकमा २ अर्ब ३५ करोड रुपैयाँभन्दा बढी छुट्याएकाले खुद नाफामा असर परेको हो ।

गत वर्ष यस अवधिसम्म कम्पनीले यो शिर्षकमा ४८ करोड रुपैयाँ मात्र छुट्याएको थियो । दोस्रो त्रैमाससम्म बैंकको वितरणयोग्य नाफा २ अर्ब ६५ करोड रुपैयाँभन्दा बढी ऋणात्मक छ । निष्क्रिय कर्जा शून्य दशमलव ५८ प्रतिशतदेखि बढेर १ दशमलव ४७ प्रतिशत कायम भएको छ ।

हाल कम्पनीको चुक्तापूँजी १४ अर्ब ९१ करोड ७५ लाख ६६ हजार रुपैयाँ छ । जगेडा कोष रकममा भने १७ अर्ब ४१ करोड रुपैयाँभन्दा बढी कायम छ । चालू आर्थिक वर्षको दोस्रो त्रैमाससम्म कम्पनीले ३ खर्ब ८ अर्ब रुपैयाँभन्दा बढी निक्षेप संकलन गरेको छ भने २ खर्ब ४५ अर्ब १३ करोड रुपैयाँभन्दा बढी कर्जा प्रवाह गरेको छ ।