काठमाडौं । एनएलजी इन्स्योरेन्स कम्पनी लिमिटेडले मंसिर ११ गतेदेखि पुस १६ गतेसम्म निष्कासन गर्दा वितरण हुन नसकेको हकप्रद शेयर माघ २० गतेदेखि लिलामीमा ल्याउने भएको छ ।
कम्पनीले हाल कायम चुक्तापूँजीको आधारमा ६२ दशमलव ५६ प्रतिशत दरले हुन आउने ९६ लाख ३१ हजार २२० दशमलव २२ कित्ता हकप्रद शेयर निष्कासन गरेकोमा ३ लाख २० हजार ५३३ दशमलव २२ कित्ता भने वितरण हुन नसकेको हो ।
कुल कित्ता अवितरित हकप्रद शेयरमध्ये संथापकतर्फ २९ हजार ९७७ दशमलव ३१ कित्ता र सर्वसाधारणतर्फ २ लाख ९० हजार ५५५ दशमलव ९१ कित्ता रहेको जानकारी कम्पनीले दिएको छ ।
यी शेयर खरीदका लागि इच्छुक खरीदकर्ताहरूले माघ २७ गतेभित्र आवेदन पेश गर्न सक्नेछन् । आवेदन दिँदा न्यूनतम १ हजार कित्तादेखि अधिकतम सम्पूर्ण कित्ता माग गर्नुपर्नेछ । अधिकतम सीमा सर्वसाधारण र सर्वसाधारण तर्फको सम्पूर्ण कित्ता हुनेछ ।
कम्पनीको हकप्रद शेयर निष्कासन तथा विक्री प्रबन्धकमा लक्ष्मी सनराइज क्यापिटल लिमिटेड रहेको छ । यस कम्पनीलाई २ अर्ब ५० करोड रुपैयाँ चुक्तापूँजी कायम गर्नुपर्ने बाध्यात्मक अवस्था छ ।
सम्पूर्ण कित्ता हकप्रद विक्रीपछि कम्पनीको चुक्तापूँजी २ अर्ब ५० करोड २६ लाख ५७ हजार रुपैयाँभन्दा बढी कायम हुनेछ ।
