काठमाडौं । अमेरिका राष्ट्रपति डोनाल्ड ट्रम्पको प्रस्ताव अनुसार इजरायलले इरानसँग द्विपक्षीय युद्धविरामका लागि मंगलवार सहमति जनाएपछि तेलको मूल्य पाँच प्रतिशतभन्दा बढीले घटेको छ ।

१२ दिन लामो युद्धपछि बजारमा समस्या कम हुने आशामा एशियाका शेयर बजारहरू माथि उठेका छन् । लन्डन, पेरिस र फ्रान्कफर्टका शेयर बजार पनि कारोबार शुरु हुनासाथ बढेका छन् ।

मंगलवार बिहान ब्रेन्ट क्रुड आयल (कच्चा तेल)को मूल्य ५.२ प्रतिशतले घटेर प्रति ब्यारेल ६७.७५ अमेरिकी डलरमा कायम भयो भने अमेरिकी क्रुड आयल ५.४ प्रतिशतले घटेर प्रति ब्यारेल ६५.०१ डलरमा कारोबार भयो । 

विश्लेषकहरू भन्छन्, 'युद्ध सकिने संकेतले बजारले खुशी देखाएको छ। ब्रेन्ट आयलको मूल्य युद्ध अघि जस्तै फर्किसकेको छ।' 

विदेशी मुद्रा बजारमा पनि अमेरिकी डलर कमजोर हुँदै गएको छ । मध्यपूर्वको जोखिम कम भयो भने अमेरिकी डलर अझ कमजोर हुन सक्छ ।

अमेरिकाले इरानको आणविक केन्द्रमा हमला गरेपछि इरानले जवाफी कारबाही गर्ने बताएपछि सोमवार तेलको मूल्य केही समयका लागि बढेको थियो। तर, पछि इरानले अमेरिकी सैनिक अड्डामा क्षेप्यास्त्र प्रहार गरेपछि तेलको मूल्य फेरि ७ प्रतिशतले घट्यो ।

इरानले संयम देखाएको र युद्धको खतरा कम भएको कारण तेलको मूल्य घटेको विशेषज्ञहरूले बताएका छन् ।

इजरायली सरकारले भनेको छ कि इरानसँगको युद्धमा उनीहरूले आफ्नो सबै लक्ष्य पूरा गरिसकेका छन् । अब युद्धविरामको कुनै पनि उल्लङ्घनमा कडा जवाफ दिने इजरायलले बताएको छ । 

युद्धविरामको सहमतिसँगै एशियाली बजारहरूमा पनि सकारात्मक वृद्धि देखिएको छ । टोकियो, साङ्घाई, हङकङ, सियोल, ताइपेई, जकार्ता र सिड्नीका शेयर बजार बढेका छन्।

युरोपका बजारहरू पनि बढेका छन् । तर तेल कम्पनीहरूको शेयरमा केही गिरावट आएको छ ।

अमेरिकी डलर कमजोर भएको छ किनकि अमेरिकी फेडरल रिजर्भले ब्याजदर कटौतीको संकेत दिएको छ । सेप्टेम्बरमा फेडले फेरि ब्याजदर घटाउने अपेक्षा गरेको छ ।