काठमाडौं । ग्लोबल आइएमई म्युचुअल फण्डअन्तर्गत सञ्चालित ग्लोबल आइएमई ब्यालेन्स्ड फण्ड-१ को प्रतिइकाई खुद सम्पत्ति मूल्य चैतको तुलनामा वैशाखमा घटेको छ । चैत मसान्तसम्म रू. ९ दशमलव ७४ रहेको योजनाको प्रतिइकाई खुद सम्पत्ति मूल्य वैशाख मसान्तसम्म रू. ९ दशमलव शून्य ९ कायम भएको हो । 

योजना वैशाख मसान्तसम्म रू. ९ करोड ३० लाखभन्दा बढी नोक्सानीमा रहेको छ । नोक्सानी रकमसमेत चैत मसान्तसम्मको तुलनामा वैशाखमा बढेको हो । चैत मसान्तसम्म योजना रू. २ करोड ६६ लाखभन्दा बढी मात्र नोक्सानीमा रहेको थियो ।

योजनाको जम्मा आम्दानी ऋणात्मक हुनुका साथै खर्चसमेत बढेकाले नोक्सानी बढेको देखिन्छ । चैत मसान्तसम्म रू. ९० लाख ४६ हजार जम्मा आम्दानी ऋणात्मक रहेकोमा वैशाख मसान्तसम्म यो रकम रू. ७ करोड ३९ लाखभन्दा बढी पुगेको छ ।

खर्च पनि चैत मसान्तसम्म रू. १ करोड ७६ लाखभन्दा बढी भएकोमा वैशाख मसान्तसम्म रू. १ करोड ९१ लाखभन्दा बढी भएको हो । १० वर्षे अवधिको बन्दमुखी प्रकृतिको यो योजना २०७९ साल जेठ ४ गतेदेखि सञ्चालनमा आएको हो । योजना सञ्चालनका लागि १० करोड २५ लाख ७६ हजार ३६० कित्ता इकाई विक्री गरिएको थियो ।

धितोपत्रमा लगानी गर्ने प्रमुख उद्देश्यका साथ सञ्चालित यो योजनाले वैशाख मसान्तसम्म धितोपत्रमा गरेको लगानीको परलमूल्य रू. ९८ करोड ७३ लाख ६६ हजार रहेको छ । योजनाको बैंक मुद्दती निक्षेपसहित धितोपत्रमा भएको लगानीको कुल मूल्य भने रू. ८७ करोड ९८ लाखभन्दा बढी मात्र छ । बैंक मुद्दती निक्षेपमा योजनाले रू. ३ करोड लगानी गरेको छ ।
रिपोर्ट हेर्न यहाँ क्लिक गर्नुहोस्