काठमाडौं । ग्लोबल आइएमई म्युचुअल फण्ड अन्तर्गत सञ्चालित ग्लोबल आइएमई ब्यालेनस्ड फण्ड १ र ग्लोबल आइएमई समुन्नत योजना १ ले माघ मसान्तसम्मको खुद सम्पत्ति मूल्य विवरण सार्वजनिक गरेका छन्  । उक्त वित्तीय विवरण अनुसार दुबै फण्डको न्याभ घटेको छ । 
ग्लोबल आइएमई समुन्नत योजना १ को न्याभ पुस मसान्तसम्ममा रू. १० दशमलव ५१ रहेकोमा माघ मसान्तमा रू. १० दशमलव ४५ मा झरेको हो । 
त्यस्तै ग्लोबल आइएमई ब्यालेनस्ड फण्ड १ को न्याभ पुस मसान्तमा रू. १० दशमलव ५१ रहेकोमा माघ मसान्तमा रू. १० दशमलव ३९ कायम भएको हो । यस फण्डको न्याभ सँगै नाफा पनि घटेको छ । फण्डको नाफा पुस मसान्तको तुलनामा माघ मसान्तमा २७ प्रतिशत घटेको छ । फण्डले पुस मसान्तसम्ममा रू. ५ करोड २१ लाख नाफा कमाएकोमा माघ मसान्तमा घटेर रू. ३ करोड ९९ लाखमा सिमित भएको छ । माघ महीनामा फण्डको खर्चमा वृद्धि भएकाले र आम्दानी घटेकाले नाफा घटेको हो ।पुस मसान्तसम्ममा फण्डको कुल आम्दानी रू. ६ करोड ५२ लाख रहेकोमा माघ मसान्तमा घटेर रू. ५ करोड ४५ लाखमा झरेको छ । त्यस्तै यस फण्डले माघ मसान्तसम्ममा सूचीकृत शेयरमा रू. ७९ करोड २३ लाख लगानी गरेको छ । 
ग्लोबल आइएमई समुन्नत योजना १ ले माघ मसान्तसम्ममा रू. २५ करोड ५३ लाख नोक्सानी ब्यहोरेको छ । पुस मसान्तसम्ममा पनि फण्ड रू. २४ करोड ९६ लाख नोक्सानीमा थियो । यस आधारमा पुस महीनाको तुलनामा माघ महीनामा फण्डको नोक्सानी बढेको छ । माघ महीनामा फण्डको खर्चमा वृद्धि भएकाले र जम्मा आम्दानी ऋणात्मक रहेकाले नोक्सानी बढेको हो । पुस मसान्तसम्ममा फण्डको जम्मा खर्च रू. ९८ लाख ९५ हजार रहेकोमा माघ मसान्तसम्ममा बढेर रू. १ करोड १५ लाख पुगेको छ । माघ मसान्तसम्ममा फण्डले सूचीकृत शेयरमा रू. ९५ करोड ६६ लाख लगानी गरेको छ ।