काठमाडौं । आइतवार दुई कम्पनीहरूले संस्थापक शेयर विक्रीका लागि सूचना जारी गरेका छन् । कालिका लघुवित्त वित्तीय संस्था लिमिटेडले ६ हजार ३८५ कित्ता र ग्रीन लाइफ हाइड्रोपावर लिमिटेडले १० लाख कित्ता संस्थापक शेयर विक्री खुला गरेका हुन् ।

दुवै कम्पनीहरूले विद्यमान संस्थापक शेयरधनीहरूले मात्र खरीद गर्न पाउने गरी यी शेयर विक्रीमा ल्याएका हुन् । इच्छुक विद्यमान संस्थापक शेयरधनीहरूले आगामी ३५ दिनभित्र सम्बन्धित कम्पनीको केन्द्रीय कार्यालयमा आवेदन पेश गर्नुपर्नेछ ।

कालिका लघुवित्तको शेयर खरीदका लागि कम्पनीको केन्द्रीय कार्यालय पोखरा, कास्कीमा र ग्रीन लाइफ हाइड्रोपावरको शेयर खरीदका लागि कम्पनीको केन्द्रीय कार्यालय कमलादी, काठमाडौंमा लिखित निवेदन पेश गर्नुपर्नेछ ।

कालिका लघुवित्तले मनोज कुमार थापाको नाममा रहेको ४ हजार १३१ कित्ता, रमेश तिवारीको नाममा रहेको १ हजार २५४ कित्ता र मोति प्रसाद पौडेलको नाममा रहेको १ हजार कित्ता शेयर विक्री खुला गरेको हो ।

पहिलो चरणमा विद्यमान संस्थापकहरूले यी शेयर खरीद नगरेमा दोस्रो चरणमा अन्य व्यक्ति तथा संस्थामा विक्री गरिने जानकारीसमेत कम्पनीहरूले दिएका छन् ।