काठमाडौं । पछिल्लो समय धितोपत्र दोस्रो बजारमा रियल सेक्टरका कम्पनीको आकर्षण बढ्न थालेको छ । यो सेक्टर (उत्पादन तथा प्रशोधन समूह)का १६ कम्पनीले आईपीओ निष्कासनका लागि नेपाल धितोपत्र बोर्ड (सेबोन)मा निवेदन दिएका छन् ।

ती कम्पनीहरूले कुल रू. २२ अर्ब ७२ करोड बराबरको ९ करोड २४ लाख ५५ हजार ६८४ कित्ता आईपीओ निष्कासन गर्नका लागि सेबोनको अनुमति पर्खिरहेका छन् ।

सरकारले एक दशकदेखि बजारमा वास्तविक क्षेत्रका कम्पनी ल्याउन विभिन्न उपाय खोजे पनि त्यस अनुरूपको नतिजा विस्तारै देखिन थालेको यसबाट पुष्टि हुन्छ ।

हाल धितोपत्रको दोस्रो बजारमा भने यस समूहका सूचीकृत कम्पनीको संख्या न्यून छ । नेपाल स्टक एक्सचेन्ज (नेप्से)मा सूचीकृत २६७ कम्पनीहरूमध्ये उत्पादन तथा प्रशोधन समूहमा ९ ओटा मात्रै छन् ।

वास्तविक क्षेत्रका कम्पनीहरूलाई शेयर बजारमा भित्र्याउन नियामक निकायहरूले सहजीकरणसँगै सहुलियतपूर्ण व्यवस्था लागू भएपछि यस क्षेत्रका कम्पनीहरू पनि शेयर बजारमा आउन इच्छुक देखिएका हुन् ।

हाल सेबोनमा निवेदन दिने उत्पादन तथा प्रशोधन समूहका कम्पनीहरूमध्ये ५ ओटाले प्रिमियम मूल्यमा, १० ओटाले अंकित मूल्यमा र १ ओटाले प्रतिकित्ता ५० रुपैयाँमा आईपीओ निष्कासन गर्न लागेको उल्लेख गरेका छन् । तीमध्ये जगदम्बा स्टील्सले सबैभन्दा धेरै २ करोड ७० हजार कित्ता आईपीओ निष्कासन गर्ने निवेदनमा उल्लेख गरेको छ । कम्पनीले अंकित मूल्यमा २ सय रुपैयाँ प्रिमियम मूल्य जोडेर प्रतिकित्ता ३ सय रुपैयाँमा आईपीओ निष्कासन गर्नेछ ।

त्यस्तै, शौर्य सिमेन्टले प्रिमियम मूल्यसहित प्रतिकित्ता रू. २६४ दशमलव ५१ मा १ करोड ५९ लाख ८१ हजार ५ सय कित्ता आईपीओ निष्कासन गर्ने निवेदनमा उल्लेख गरेको छ ।

त्यसैगरी, मारुती सिमेन्ट्सले प्रिमियमसहित प्रतिकित्ता ३७७ मा १ करोड १६ लाख कित्ता, रिद्धि सिद्धि सिमेन्टले प्रतिकित्ता रू. २१४ दशमलव १० र अम्बे स्टिल्सले रू. ३०३ मा १ करोड ११ लाख ९२ हजार ७२७ कित्ता आईपीओ निष्कासन गर्ने तयारीमा छन् ।

यी कम्पनीहरूले सेबोनबाट स्वीकृति पाएपछि मात्रै आईपीओ निष्कासन गर्नेछन् । यीमध्ये अधिकांश कम्पनीले स्थानीय बासिन्दा र सर्वसाधारणको लागि आईपीओ निष्कासन गर्ने निवेदनमा उल्लेख गरेका छन् ।

आईपीओ निष्कासनका लागि सेबोनमा निवेदन दिने रियल सेक्टरका १६ कम्पनी

कम्पनीको नाम	आईपीओ कित्ता	विक्री प्रबन्धक
जगदम्बा स्टिल्स	२,००,७०,०००	सिद्धार्थ क्यापिटल
शौर्य सिमेन्ट इण्डष्ट्रिज लिमिटेड	१,५९,८१,५००	नबिल इन्भेष्टमेन्ट बैंकिङ्ग
रिद्धि सिद्धि सिमेन्ट	१,२१,७१,५००	एनआइएमबि एस क्यापिटल
मारुती सिमेन्ट्स	१,१६,००,०००	नबिल इन्भेष्टमेन्ट बैंकिङ्ग
अम्बे स्टिल्स	१,११,९२,७२७	नबिल इन्भेष्टमेन्ट बैंकिङ्ग
पाल्पा सिमेन्ट	७५,००,०००	नबिल इन्भेष्टमेन्ट बैंकिङ्ग
एसवाई प्यानल नेपाल	५२,३२,५४८	प्रभु क्यापिटल
ओम मेगाश्री फर्मास्यूटिकल्स	१८,००,०००	प्रभु क्यापिटल
भूगर्भ सिमेन्ट	१२,६२, ५००	नबिल इन्भेष्टमेन्ट बैंकिङ्ग
सोपान पर्मास्युटिकल्स	११,००,०००	एनमबि क्यापिटल
लक्ष्मी टेक्नो प्लाष्ट	१०,००,०००	नेपाल एसबिआई मर्चेण्ट
श्री डिष्टिलरी	९,६०,०००	प्रभु क्यापिटल
सागर डिष्टिलरी	७,९२,०००	मुक्तिनाथ क्यापिटल
एक्क्र्ड फर्मास्युटिकल्स	७,०६,९०९	ग्लोबल आइएमई क्यापिटल
एभरेष्ट क्लर लिमिटेड	७,८०,०००	मुक्तिनाथ क्यापिटल
स्मार्ट डोर्स	३,०६,०००	मुक्तिनाथ क्यापिटल
कुल कित्ता	९,२४,५५,६८४

स्रोत : सेबोन