काठमाडौँ । लामो समयदेखि रोकिदै आएको साधारण शेयर निष्काशनका लागि अनुमति दिने प्रक्रिया शुरु भएको छ । नियामक निकाय नेपाल धितोपत्र बोर्डले दुई ओटा कम्पनीलाई साधारण शेयर विक्रीका लागि पछिल्लो पटक अनुमति दिएको छ । 

बोर्डले क्रेष्ट माइक्रो लाइफ इन्स्योरेन्स लिमिटेड र ओम मेगाश्री फार्मासिटिकल्सलाई साधारण शेयर विक्रीका लागि अनुमति दिएको छ । बोर्डले क्रेष्ट माइक्रो लाइफ इन्स्योरेन्सलाई रु २२ करोड ५० लाख मूल्य बराबरको २२ लाख ५० हजार  कित्ता साधारण शेयर विक्री लागि यही माघ ३ गते अनुमति दिएको हो । सो कम्पनीको शेयर विक्री प्रबन्धकमा एनआइएमबी एस क्यापिटल रहेको छ । 

यस्तै, बोर्डले ओम मेगाश्रीलाई रु १८ करोड बराबरको १८ लाख कित्ता साधारण शेयर विक्रीका लागि अनुमति दिएको छ । सो कम्पनीको शेयर विक्री प्रबन्धकमा प्रभु क्यापिटल रहेको छ । बोर्डले दुई ओटा कम्पनीको रु ८५ करोड ५० लाख मूल्य बराबरको ८५ लाख ५० हजार कित्ता साधाण शेयर विक्रीका लागि अनुमति दिएको हो । 

यस्तै, बोर्डले साना तथा मझौला संगठित संस्थाको धितोपत्र निष्काशन तथा कारोबार नियमावली लागू गरेको छ । सो नियमावली लागू भएसँगै साना तथा मझौला संस्थालाई साधारण शेयर विक्रीका लागि मार्ग प्रशस्त भएको छ । शेयर बजारको विस्तारका लागि यो नियमावली महत्वपूर्ण रहेको छ । 

बोर्डमा हालसम्म रु ५१ अर्ब ११ करोड २४ लाख एक हजार ६३२ मूल्य बराबरको ३५ करोड ५० लाख ३७ हजार २८५ कित्ता साधारण शेयर विक्रीका लागि आवेदन परेको छ ।