काठमाडौं । बुधवार (आज) अधिकांश विकास बैंकहरूको शेयर मूल्य उच्चदरले वृद्धि भएको छ । यस समूहको समूहगत सूचक आज सबैभन्दा बढी ३ दशमलव ३८ प्रतिशत वृद्धि भएको छ । अर्थात् यस समूहका कम्पनी लगानीकर्ताको रोजाइमा परेका छन् । 

लगानीकर्ताको रोजाइमा परे पनि यस समूहका सबै कम्पनी नाफामा भने छैनन् । नेपाल स्टक एक्सचेन्ज (नेप्से)मा सूचीकृत १६ विकास बैंकले सार्वजनिक गरेको चालू आर्थिक वर्ष (आव)को पहिलो त्रैमासिक वित्तीय विवरण अनुसार पाँच बैंक घाटामा छन् भने ११ बैंक मात्रै नाफामा छन् । 

पहिलो त्रैमासमा नोक्सानी व्यहोर्ने विकास बैंकहरूमा नारायणी डेभलपमेन्ट बैंक, ग्रीन डेभलपमेन्ट बैंक, कर्णाली डेभलपमेन्ट बैंक, सप्तकोशी डेभलपमेन्ट बैंक र एक्सेल डेभलपमेन्ट बैंक छन् । 

यो अवधिमा नारायणी डेभलपमेन्ट बैंकले रू. ४८ लाख ५० हजार नोक्सानी व्यहोरेको छ । गत आवको पहिलो त्रैमासमा बैंक रू. १ करोड २१ लाख घाटामा थियो । 

यस कम्पनीको शेयर मूल्य धितोपत्रको दोस्रोमा बजारमा प्रतिकित्ता रू. १ हजार ११६ पुगेको छ । पहिलो त्रैमासमा यस बैंकको निष्क्रिय कर्जा ३४ दशमलव ८१ प्रतिशत छ । 

त्यस्तै, ग्रीन डेभलपमेन्ट बैंक रू. १ करोड ५६ लाख, एक्सेल डेभलपमेन्ट बैंक रू. १२ करोड ३० लाख र सप्तकोशी डेभलपमेन्ट बैंक रू. ८ करोड ७७ लाख नोक्सानीमा छन् । 

धितोपत्रको दोस्रो बजारमा भने यिनै कम्पनीहरूको शेयर मूल्य उच्च छ । यी कम्पनीहरूको खराब कर्जा पनि उच्च छ । 

खराब कर्जा उच्च भएको कम्पनीहरूको किन शेयर मूल्य उच्च भयो ? जानकारहरू भन्छन्– यसको एक कारण बैंकहरूको शेयर संख्या कम हुनु हो । 

अधिकांश विकास बैंकहरूको शेयर संख्या न्यून छ । जसका कारण बजारमा शेयर आपूर्ति कम भएकाले लगानीकर्ताको रोजाइमा परेको एक ब्रोकरले बताए । 

सूचीकृत विकास बैंकमध्ये कर्पोरेट डेभलपमेन्ट बैंकको शेयर मूल्य सबैभन्दा बढी छ । उक्त बैंकको शेयर मूल्य प्रतिकित्ता रू. १ हजार २२१ छ । 

यस कम्पनीले पहिलो त्रैमासमा रू. २१ लाख ६८ हजार नाफा कमाएको छ । गत आवको पहिलो त्रैमासको तुलनामा यस बैंकको नाफा ४४ दशमलव ८३ प्रतिशत कम हो । सो अवधिमा बैंकले रू. ३९ लाख ३० हजार नाफा कमाएको थियो । 

पहिलो त्रैमासमा १६ बैंकहरूमध्ये मुक्तिनाथ विकास बैंकले सर्वाधिक नाफा कमाएको छ । यस बैंकले पहिलो त्रैमासमा रू. २८ करोड १८ लाख नाफा कमाएको छ । सो अवधिमा सर्वाधिक नाफा कमाउने विकास बैंकको सूचीमा दोस्रोमा शाइन रेसुङ्गा डेभलपमेन्ट बैंक छ । यस बैंकले रू. २३ करोड ९३ लाख नाफा कमाएको छ । 

पहिलो त्रैमासमा निष्क्रिय कर्जा (खराब कर्जा) सबैभन्दा बढी हुने विकास बैंक हो, नारायणी डेभलपमेन्ट बैंक । यो बैंकको निष्क्रिय कर्जा ३४ दशमलव ८१ प्रतिशत छ । निष्क्रिय कर्जा सबैभन्दा कम हुनेमा मितेरी डेभलपमेन्ट बैंक छ, यो बैंकको निष्क्रिय कर्जा १ दशमलव ८ प्रतिशत छ । 

कम्पनीको नाम	खुद नाफा/नोक्सान रू. हजारमा		घटबढ प्रतिशत	निष्क्रिय कर्जा प्रतिशतमा	पछिल्लो शेयर मूल्य रू.
	चालू आवको पहिलो त्रैमास	गत आवको पहिलो त्रैमास
मुक्तिनाथ विकास बैंक	281,819	228,807	23.17	3.16	410.5
शाइन रेसुङ्गा डेभलपमेन्ट बैंक	239,363	191,654	24.89	3.5	482.5
गरिमा विकास बैंक	225,743	201,554	12	3.82	458.9
लुम्बिनी विकास बैंक	201,985	173,280	16.57	3.69	511
कामना सेवा विकास बैंक	174,979	119,521	46.4	3.96	477
ज्योति विकास बैंक	151,190	50,802	197.61	4.98	388
महालक्ष्मी विकास बैंक	94,289	95,378	-1.14	4.9	426.9
सांग्रिला डेभलपमेन्ट बैंक	60,179	46,591	29.16	4.65	460
सिन्धु विकास बैंक	23,058	1,929	1095.33	11.29	862.4
मितेरी डेभलपमेन्ट बैंक	7,361	17,545	-58.05	1.8	703.8
कर्पोरेट डेभलपमेन्ट बैंक	2,168	3,930	-44.83	4.95	1221
नारायणी डेभलपमेन्ट बैंक	-4,850	-12,159	-	34.81	1116
ग्रीन डेभलपमेन्ट बैंक	-15,672	7,619	-	4.73	962.1
कर्णाली डेभलपमेन्ट बैंक	-19,829	40,861	-	7.27	784.1
सप्तकोशी डेभलपमेन्ट बैंक	-87,784	-119,219	-	14.77	849.3
एक्सेल डेभलपमेन्ट बैंक	-123,016	-139,026	-	11.73	669

स्रोत : सम्बन्धित कम्पनीको चालू आवको पहिलो त्रैमासिक वित्तीय विवरण र नेप्से ।