काठमाडौं । साताको पहिलो कारोबार दिन आइतवार नेप्से परिसूचक घटेर बन्द भएको छ । आइतवारसँगै लगातार तीन कारोबार दिन नेप्से घटेको हो । आइतवार नेप्से परिसूचक ४ दशमलव ५९ अंक घटेर २ हजार ७३ दशमलव १९ विन्दुमा कायम भएको छ  ।

आज कारोबार रकम भने बढेको छ । अघिल्ला कारोबार दिनम रू. ४ अर्ब ३८ करोड बराबरको कारोबार भएकोमा आज रू. ५ अर्ब भन्दा बढी भएको छ । 

२१ सय विन्दुभन्दा तल झरेपछि बजार केही सुस्त देखिरहेको छ । सूचकमा खासै ठूलो उतारचढाव देखिएको छैन । नेप्से २ हजारको मनोवैज्ञानिक रेखाबाट माथि जान सकेको छैन भने ठूलो अंकले तल झर्न पनि सकेको छैन । 

यसअघि  आगामी आर्थिक वर्षको बजेट सार्वजनिक हुनु अघि नेप्से २१ सय विन्दुभन्दा माथि नै टिकेको थियो । तर बजेट सार्वजनिक भएपछि सूचक पुनः २ हजारको लाइनमा झरेको छ । मौद्रिक नीतिका लागि राष्ट्र बैंकले सरोकारवालासँग सुझाव पनि  मागेको छ भने लगानीकर्ता नयाँ मौद्रिक नीतिको पर्खाइमा छन् ।

यस दिन सेन्सेटिभ इन्डेक्स शून्य दशमलव ५८ प्रतिशत,फ्लोट इन्डेक्स शून्य दशमलव ३४ प्रतिशत र सेन्सेटिभ फ्लोट इन्डेक्स शून्य दशमलव ६९ प्रतिशत घटेको छ । 

३१३ धितोपत्रको १ करोड ४ लाख ५२ हजार १२८ कित्ता शेयर ६९ हजार २१९ पटकमा रू. ५ अर्ब १८ करोड बराबरको कारोबार भएको छ । कारोबारमा आएका धितोपत्रमध्ये चार धितोपत्रको मूल्यमा सकारात्मक सर्किट लागेको छ । इर्ष्टन हाइड्रोपावर,शुभम पावर ,सिटी होटल र कुथेली बुखरी स्मल हाइड्रोपावर कम्पनीको शेयर मूल्य अघिल्लो कारोबार दिनको तुलनामा आज १० प्रतिशतका दरले वृद्धि भएसँगै सकारात्मक सर्किट लागेको हो । 

आइतवार बुद्धभूमि नेपाल हाइड्रोपावर कम्पनीको शेयर मूल्यमा भने नेगेटिभ सर्किट लागेको छ । यस कम्पनीको शेयर मूल्य अघिल्लो कारोबार दिनको तुलनामा आज १० प्रतिशत घटेसँगै नेगेटिभ सर्किट लागेको हो । शेयर मूल्य प्रतिकित्ता रू.६४३ दशमलव ५० मा झरेको छ ।

त्यस्तै दोस्रोमा पोखरा फाइनान्सको शेयर मूल्य ७ दशमलव १२ प्रतिशत घटेर रू.५७० कायम भएको छ । सर्वाधिक शेयर खरीदविक्रीको हिस्सा एनआरएन इन्फ्रास्ट्रक्चर एण्ड डेभलपमेन्टले ओगटेको छ । यस कम्पनीको रू. ३२ करोड ३ लाख बराबरको भएको हो । शेयर मूल्य प्रतिकित्ता रू. ६५० कायम भएको छ । त्यस्तै सर्वाधिक शेयर खरीदविक्री हुने दोस्रोमा सिईडिबी हाइड्रोपावर डेभलपमेन्ट कम्पनीको रू.२१ करोड १३ लाख बराबरको भएको हो । 

कारोबारमा आएका १३ समूहगत परिसूचकमध्ये अन्य समूहको सूचक स्थिर रहेको छ भने चार समूहको सूचक बढेको छ बाँकी आठ समूहको सूचक घटेको छ । सबैभन्दा बढी होटल तथा पर्यटन समूहको सूचक २ दशलमव ९२ प्रतिशत वृद्धि भएको छ भने ब्यापार समूहको सूचक १ दशमलव ५४ प्रतिशत घटेको छ ।