काठमाडौं। वातावरणीय दिगो विकास तथा स्थानीय जैविक विविधता सुधारको लागि एक प्रेरणादायी प्रयास स्वरूप जेन गुडाल इन्स्टिच्युट नेपाल, लक्ष्मी सन्राइज बैंक, टीका विद्याश्रम उच्च माध्यमिक विद्यालय र ‘रेभोल्युसन प्रोजेक्ट’को सहकार्यमा काठमाडौंको टिका विद्याश्रम उच्च माध्यमिक विद्यालयमा २५० ओटा रुखको ‘नेटिभ पकेट वन’ बनाउने उद्देश्यले वृक्षरोपण गरेको छ । 

विश्व प्रसिद्ध एथोलोजिस्ट तथा वातावरणविद् डा. जेन गुडाल कार्यक्रममा उपस्थिति भई रुखप्रति आफ्नो सम्मान व्यक्त गर्दै वातावरणीय शिक्षा र दिगो विकासमा यस पहलको योगदानको प्रशंसा गरे । साथै उनले बैंकको वातावरणीय संरक्षणको प्रतिबद्धता र विभिन्न अभ्यासको समेत सराहना गरेका थिए । २५० ओटा रुखको नेटिभ पकेट वनको वृक्षरोपण ‘मियावाकी प्रविधि’बाट गरिएको बताइएको छ । यस प्रविधिले जैविक विविधता बढाउने मात्र नभएर एक दिगो हरित उद्यानको सृजना गर्दै स्थानीय पर्यावरणलाई फाइदा पुर्‍याउनुका साथै विद्यार्थी तथा स्थानीय समुदायको प्रकृतिसँग दीर्घकालीन सम्बन्ध प्रोत्साहन गर्ने बताइएको छ ।

बैंकको आर्थिक सहयोग रहेको सो वृक्षारोपण पहलको नेतृत्व रेभोल्युसन प्रोजेक्टका विज्ञद्वारा भएको थियो । यो पहल बैंकको गत महीना सम्पन्न नवौं आमन्त्रण गल्फ प्रतियोगितामा गरिएको ‘हजार रुख रोप्ने प्रतिबद्धता’को एक पाटो रहेको बताइएको छ । यस सहकार्यले वातावरणीय संरक्षणको लागि वातावरणीय विज्ञ, व्यवसाय र शैक्षिक संस्थाबीचको साझेदारी र यस्ता सामूहिक पहलको महत्त्वलाई उजागर गर्ने बताइएको छ ।