काठमाडौं । माघ महीनामा मात्र धितोपत्र दोस्रो बजारमा ३ करोड ३२ लाख २३ हजार ४८९ दशमलव ४३ कित्ता शेयर थपिएको छ ।

यो महीना एक कम्पनीको एफपीओ र एक कम्पनीको आईपीओसँगै १० कम्पनीको बोनस शेयर गरी उल्लेखित कित्तामा शेयर थपिएको हो । नेप्सेले सार्वजनिक गरेको तथ्याङ्कअनुसार यो महीना महुली लघुवित्तको ४ लाख ७५ हजार ४४९ दशमलव १५ कित्ता एफपीओ र गार्डियन माइक्रो लाइफको ७५ लाख कित्ता आईपीओ दोस्रो बजारमा थपिएको हो ।

यी बाहेक सुपरमाई हाइड्रोपावरको ५ प्रतिशत, सानिमा रिलायन्स लाइफको १८ दशमलव ३८११ प्रतिशत, साहस उर्जाको ८ प्रतिशत, सगरमाथा जलविद्युतको ४ दशमलव ७५ प्रतिशत, ओरियण्टल होटलको ५ प्रतिशत, रू रू जलविद्युतको १५ प्रतिशत, नेशनल लघुवित्तको १४ दशमलव २५ प्रतिशत, सोल्टी होटलको १० प्रतिशत, एनआरएन इन्फ्रास्ट्रक्चर एण्ड डेभलपमेन्टको ५ प्रतिशत र मन्दाकिनी हाइड्रोपावरको ५ प्रतिशत बोनस शेयर पनि माघ महीनामा दोस्रो बजारमा सूचीकृत भएको हो ।

यी शेयर सूचीकृतपछि कारोबारयोग्य भई सम्बन्धित शेयरधनीहरूको हितग्राही खातामा जम्मा गर्ने काम शुरु भइसकेको जानकारी कम्पनीहरूले दिएका छन् । पछिल्लो समय धितोपत्र कारोबारका लागि हितग्राही खाता अनिवार्य भएसँगै कम्पनीहरूले बोनस शेयर हितग्राही खातामानै जम्मा गर्दै आएका छन् ।

आईपीओ र एफपीओका सम्बन्धमा आवेदन दिँदाको समयमै प्रक्रिया पूरा भैसकेको हुन्छ भने बोनस शेयरको सम्बन्धमा पुराना लगानीकर्ताहरूले अझै पनि हितग्राही खाता खोली आफ्नो शेयर अभौतिकीकरण गराउन बाँकी रहेको हुन्छ । शेयरधनीहरूले हितग्राही खाता खोली आफ्नो शेयर अभौतिकीकरण गराएपछि मात्र कम्पनीहरूले बोनस शेयर जम्मा गर्ने गरेका छन् ।

यसर्थ हालसम्म पनि उल्लेखित कम्पनीहरूको शेयर अभौतिकीकरण गराउन बाँकी र हितग्राही खाता पनि नखोलेका सदस्यहरूले यथाशीघ्र खोली आफ्नो बोनस प्राप्त गर्न कम्पनीहरूले अनुरोध गरेका छन् ।