वीरगञ्ज । कृषि विकास बैंक लिमिटेडले वीरगञ्जमा उद्यमी व्यापारीहरूसँग आफ्ना सेवाबारे अन्तरक्रिया गरेको छ । शुक्रबार साँझ भएको अन्तरक्रियामा बैंकले वीरगञ्ज उद्योग वाणिज्य संघका नवनिर्वाचित पदाधिकारीहरूलाई बधाई र शुभकामनासमेत दिएको थियो । 

बैंकका प्रमुख कार्यकारी अधिकृत गोबिन्द गुरुङले संघका पदाधिकारीलाई माला लगाएर शुभकामना दिएका थिए । उनले कृषिक्षेत्रका लगानी बढाएर अर्थतन्त्रमा कृषिको योगदान बढाउन सकिने बताए । 

कृषि क्षेत्रमा अवसर भएर पनि पर्याप्त पूर्वाधारको अभावमा यो क्षेत्रले अपेक्षित लाभ लिन नपाएको दाबी गर्दै उनले उद्यमीलाई कृषि क्षेत्रमा व्यावसायिक लगानी बढाउन आग्रह पनि गरे । कृषि विकास बैंकले अहिले जलविद्युत्, स्टील, सिमेन्ट, आयातनिर्यात व्यापारलगायत अन्य वाणिज्य बैंकहरूले दिने सबैखालका क्षेत्रमा प्रतिस्पर्धी सेवा प्रवाह गरिरहेको पनि बताए । 

कृषि विकास बैंको आधार दर ६ दशमलव ४८ प्रतितशत रहेको भन्दै चैत महीनाभित्र प्रक्रियामा जाने सबैखालका कर्जामा शून्य दशमलव ५ प्रतिशत प्रिमियममा कर्जा दिने नीति लिएको जानकारी उनले दिए । 

उपमहाप्रबन्धक सुदीप दाहालले बैंकले साना किसानदेखि ठूला उद्यम र योजनामा सुलभ ब्याजदरमा कर्जा लगानी गरिरहेको स्पष्ट पारे । सबैखालको उद्यममा बैंकले वित्तीय सहयात्रीको रुपमा काम गरिरहेको दाबी पनि गरे । 

बैंकका मधेश प्रदेश निर्देशक रामप्रसाद गजुरेलले आफ्ना ग्राहकहरूलाई सहजरुपमा सेवा प्रदान गर्न आफू सधैै तत्पर रहेको बताए । कार्यक्रममा वीरगञ्ज उद्योग वाणिज्य संघका कार्यवाहक अध्यक्ष माधव राजपाल, निवर्तमान अध्यक्ष अनिल अग्रवाल, संघका सहसचिव अनुप अग्रवाल,

जीतपुरसिमरा उद्योग वाणिज्य संघका अध्यक्ष मोहन शर्मा, मेडिकल व्यवसायी बशुरूद्धिन अन्सारी, जगदम्बा ग्रुपका निर्देशक रमेश अग्रवाललगायतले प्रतिस्पर्धी ब्याजदर र ग्राहकमैत्री सेवाको आवश्यकतामा जोड दिएका थिए ।