काठमाडौं । नेपाल माइक्रो इन्स्योरेन्स कम्पनी लिमिटेडले सर्वसाधारणमा निष्कासन गरेको आईपीओ बाँडफाँट गरेको छ । विक्री प्रबन्धक एनआईएमबि क्यापिटलको कार्यालय लाजिम्पाट, काठमाडौंमा शुक्रवार बिहान आईपीओ बाँडफाँट कार्य सम्पन्न गरेको हो । मागभन्दा बढी आवेदन पर्न आएकाले गोलाप्रथाको माध्यमबाट कम्पनीको आईपीओ बाँडफाँट गरिएको विक्री प्रबन्धकले जानकारी दिएको छ ।

विक्री प्रबन्धकमा अनुसार कम्पनीको आईपीओमा कुल १८ लाख १७ हजार १४८ जनाले आवेदन दिएका थिए । कुल आवेदकहरूमध्ये १८ लाख ६ हजार ७६२ जनाको आवेदन रितपूर्वक भएको थियो । रितपूर्वक प्राप्त आवेदकहरूलाई बाँडफाँटमा सहभागी गराई १ लाख ८४ हजार ५०० जनालाई १० कित्ताको दरले शेयर बाँडफाँट गरिएको विक्री प्रबन्धकले जानकारी दिएको छ । कम्पनीले फागुन ११ गतेदेखि १५ गतेसम्म आम सर्वसाधारणका लागि १८ करोड ४५ लाख रुपैयाँ बराबरको १८ लाख ४५ हजार कित्ता आईपीओ निष्कासन गरेको थियो । 

आम सर्वसाधारणमा आईपीओ निष्कासन गर्नुअघि कम्पनीले माघ ८ गतेदेखि २२ गतेसम्म वैदेशिक रोजगारीमा रहेका नेपालीका लागि २ लाख २५ हजार कित्ता आईपीओ निष्कासन गरी माघ २९ गते बाँडफाँट गरेको थियो । कम्पनीले आफ्नो जारी पूँजी ७५ करोड रुपैयाँको ३० प्रतिशतले हुन आउने २२ करोड ५० लाख रुपैयाँ बराबरको २२ लाख ५० हजार कित्ता आईपीओ निष्कासनका लागि नेपाल धितोपत्र बोर्डबाट अनुमति पाएको हो । कुल कित्ता आईपीओमध्ये १० प्रतिशत वैदेशिक रोजगारीमा रहेका नेपालीमा बाँडफाँटपश्चात् कम्पनीका कर्मचारीहरूका लागि ६७ हजार ५०० कित्ता र सामूहिक लगानी कोषहरूलाई समेत १ लाख १२ हजार ५०० कित्ता शेयर बाँडफाँट गरिसकिएको जानकारी कम्पनीले दिएको छ । 

लघु निर्जीवन बीमा व्यवसायी कम्पनीको रूपमा यो कम्पनी २०८० वैशाख २६ गतेदेखि सञ्चालनमा छ । अघिल्लो आर्थिक वर्ष ०७९/८० सम्मको वास्तविक वित्तीय विवरण अनुसार कम्पनी १७ लाख ९९ हजार रुपैयाँ सञ्चित मुनाफामा छ । सो अवधिसम्म कम्पनीको प्रतिशेयर नेटवर्थ १०० रुपैयाँ ८० पैसा र प्रतिशेयर आम्दानी ८० पैसा छ । गत आर्थिक वर्ष ०८०/८१ सम्मको अपरिस्कृत वित्तीय विवरण अनुसार भने कम्पनी ३० लाख ८८ हजार रुपैयाँ सञ्चित नाफामा रहेको छ ।

यस अवधिसम्म प्रतिशेयर नेटवर्थ १०१ रुपैयाँ ३६ पैसा रहेको कम्पनीको प्रतिशेयर आम्दानी ५६ पैसा कायम छ । नेपाल बीमा प्राधिकरणको निर्देशनबमोजिम यस कम्पनीलाई ७५ करोड रुपैयाँ चुक्तापूँजी कायम गर्नुपर्नेछ ।

हाल ५२ करोड ५० लाख रुपैयाँ चुक्तापूँजी रहेको कम्पनीको आईपीओपछि ७५ करोड रुपैयाँ चुक्तापूँजी कायम हुनेछ । कम्पनीले आईपीओ बाँडफाँटपछि दोस्रो बजारमा सूचीकृत गराउनेछ । दोस्रो बजारमा कम्पनीको पहिलो कारोबार मूल्य वास्तविक प्रतिशेयर नेटवर्थदेखि त्यसको तीन गुणासम्म प्राप्त गर्नेछ ।