काठमाडौं । सोमवार बढेको बजार मंगलवार भने सामान्य अंकले घटेको छ । सोमवार १६ दशमलव ९६ अंकले बढेको बजार मंगलवार २ दशमलव ५७ अंकले घटेको छ । 

यो दिन नेप्से परिसूचक १ हजार ८९९ दशमलव ७० विन्दुमा पुगेर बन्द भएको छ । मंगलवारको कारोबारमा नेप्से परिसूचक न्यूनतम १ हजार ८८८ दशमलव ८२ विन्दुमा र अधिकतम १ हजार ९०४ दशमलव ७५ विन्दुसम्म पुगेको थियो ।

चार कारोबार दिनपछि सोमवार बढेको बजारमा नाफा बुक गर्नेहरू हाबी हुँदा मंगलवार नेप्से परिसूचकमा असर परेको हो । यो दिन सेन्सेटिभ इन्डेक्स पनि शून्य दशमलव ४४ प्रतिशत घटेर ३७१ दशमलव ३० विन्दुमा झरेको छ । 

सोमवारको तुलनामा मंगलवार कारोबार रकमसमेत घटेको छ । सोमवार रू. १ अर्ब ३६ करोड ६० लाख बराबरको ४४ लाख ७० हजार ६२५ कित्ता धितोपत्र खरीदविक्री भएकोमा मंगलवार रू. ७७ करोड ७० लाख ८९ हजार बराबरको २० लाख ५८ हजार ५१० कित्ता धितोपत्र खरीदविक्री भएको छ । मंगलवार २४८ कम्पनीको १६ हजार ३२० पटकको व्यापारमा उल्लिखित कित्ता धितोपत्रको कारोबार भएको हो ।

कुल कारोबारमा सर्वाधिक हिस्सा नबिल बैंकले ओगटेको छ । सोमवार पनि नबिल बैंकले नै कुल कारोबार रकममा सर्वाधिक हिस्सा ओगटेको थियो । सोमवार रू. २१ करोड ३२ लाख ४१ हजार बराबरको २ लाख ६१ हजार ५१९ कित्ता शेयर कारोबार भएको नबिल बैंकको मंगलवार रू. ७ करोड १७ लाख ५६ हजार बराबरको ८८ हजार ६९० कित्ता धितोपत्र कारोबार भएको छ ।

घटेको बजारमा सिवाईसी नेपाल लघुवित्तको शेयर मूल्य १० प्रतिशतले बढेको छ । सिवाईसी नेपाल लघुवित्तको शेयर मूल्य प्रतिकित्ता रू. २०५ दशमलव ४० ले बढेर अन्तिम मूल्य रू. २ हजार २६० दशमलव २० कायम भएको छ । 

यस दिन तेह्रथुम पावर कम्पनीको शेयर मूल्य सर्वाधिक ३ दशमलव २९ प्रतिशतले घटेको छ । यस कम्पनीको शेयर मूल्य प्रतिकित्ता रू. १० दशमलव ९० ले घटेर अन्तिम मूल्य रू. ३२० कायम भएको छ ।

मंगलवारको कारोबारले कुल बजार पूँजीकरण रू. ३ अर्ब ६९ करोड ४८  लाखले घटेको छ । सोमवार रू. २७ खर्ब ३९ अर्ब ३९ करोड ५४ लाख रहेको कुल बजारपूँजीकरण मंगलवार रू. २७ खर्ब ३५ अर्ब ७० करोड कायम भएको छ ।