काठमाडौं । चालू आर्थिक वर्ष (आव)को सात महीनामा १४ निर्जीवन बीमा कम्पनीले कुल रू. २४ अर्ब २७ करोड बराबरको व्यवसाय गरेका छन् ।

नेपाल बीमा प्राधिकरणले सार्वजनिक गरेको तथ्याङ्कले यस्तो देखाएको हो । उक्त तथ्याङ्कअनुसार निर्जीवन बीमा कम्पनीहरूको व्यवसाय गत आवको सोही अवधिको तुलनामा ७ दशमलव ८० प्रतिशत वृद्धि हो । गत आवको सोही अवधिमा निर्जीवन बीमा कम्पनीहरूले रू. २२ अर्ब ५१ करोड बराबरको व्यवसाय गरेका थिए ।  

चालू आवको सात महीनामा रकमका आधारमा सबैभन्दा धेरै बीमा शुल्क आर्जन गर्नेमा शिखर इन्स्योरेन्स छ । यस कम्पनीले यो अवधिमा रू. ३ अर्ब १३ करोडभन्दा बढी बीमा शुल्क आर्जन गरेको छ । यो बीमा शुल्क गत आवको सोही अवधिको तुलनामा ८ दशमलव १६ प्रतिशत बढी हो । गत आवमा कम्पनीले रू. २ अर्ब ८९ करोड बीमा शुल्क आर्जन गरेको थियो । 

चालू आवको सात महीनामा रकमका आधारमा सबैभन्दा धेरै बीमा शुल्क संकलन गर्ने निर्जीवन बीमा कम्पनीको सूचीमा दोस्रोमा सगरमाथा लुम्बिनी इन्स्योरेन्स छ । कम्पनीले यो अवधिमा रू. २ अर्ब ९३ करोड बीमा शुल्क आर्जन गरेको छ । 

समीक्षा अवधिमा चार निर्जीवन बीमा कम्पनीहरूको बीमा शुल्क घटेको छ भने बाँकीको बढेको छ ।

सो अवधिमा प्रतिशतका आधारमा सबैभन्दा बढी बीमा शुल्क नेपाल इन्स्योरेन्स आर्जन गरेको छ । कम्पनीको बीमा शुल्क ४४ दशमलव १६ प्रतिशत वृद्धि भएको छ । यस कम्पनीले गत आवमा रू. ८७ करोड ३७ लाख बीमा शुल्क आर्जन गरेकोमा चालू आवमा बढेर रू. १ अर्ब २५ करोडभन्दा बढी पुगेको छ ।

यो सूचीमा दोस्रोमा दि ओरियण्टल इन्स्योरेन्स छ । कम्पनीको बीमा शुल्क ४३ दशमलव ६८ प्रतिशत वृद्धि भएको छ ।