पोखरा । पोखरा महानगरपालिका–३३ सुरौदी खोला किनाराको तिखेढुङ्गा होस वा पोखरा–१३ ढाँडबेसी र आसपासका फाँट धेरै ठाउँमा तरबुजा लटरम्म फलेको देख्न सकिन्छ । विगतमा तराई र भारतबाट आएका तरबुजामात्र खाएका पोखरेली यतिखेर आफ्नै गाउँठाउँमा फलेका स्वादिलो तरबुजाको स्वाद लिन पाउँदा दङ्ग छन् ।

सुरौदीको तिखेढुङ्गामा अगुवा कृषकद्वय रमेश आचार्य र ज्ञानबहादुर कार्कीले संयुक्त रूपमा गरेको तरबुजा खेती होस् वा आर्वाको ढाँडबेसीमा ई विक्रम बरालसहित युवा रवि, अर्जुन, मनिशलगायतले संयुक्त रूपमा लगाएको तरबुजा यतिखेर रोजगारीकै खोजीमा विदेशिएका युवाका लागि पनि दरिलो पाठ बनेको छ ।

रुद्रगङ्गा कृषि बहुउद्देश्यीय कृषि फर्ममार्फत ढाँडबेसीको १५ रोपनीमा गरिएको तरबुजा खेतीबाट लगाएको चार महिनामा नै १५ लाख रूपैयाँ आम्दानी गरिसकिएको ई बरालले जानकारी दिए ।

विगतमा तराई र भारतबाट मात्रै तरबुजा आउने र खाने गरिएकोमा पोखरामै पनि राम्रो फल्छ भन्ने कुरा चरितार्थ पार्न सफल भएको उनले बताए । “हामीले लगाएको तरबुजा लटरम्म फलेको छ”, उनले भने, “हामीले ३ हजार ५ सय किलोग्राम तरबुजा उत्पादन गरिसकेका छौँ ।” 

पोखरा महानगरपालिका–३३ सुरौदी फाँटको तिखेढुङ्गामा अगुवा कृषकद्वय ज्ञानबहादुर कार्की र रमेश आचार्यले ३५ रोपनीमा तरबुजा लगाएका छन् । उनीहरूले लगाएको तरबुजा अबको केही दिनमा नै बजारमा आउने कृषक रमेश आचार्यले बताए । उनीहरूले सरस्वती, रेड भेलरेट, फनेक्स, मान्ठाना र राजा जातका खरबुजा फलाएका छन् ।

पोखरा–१३ पाटनवेशीका बुद्धप्रसाद बरालले ३ रोपनीमा तरबुजा लगाएकोमा झण्डै ६०० किलोग्राम बिक्री गरिसकेका छन् । उनको लक्ष्मी बराल एग्रोफर्ममा फलेको तरबुजा बजारमा माग अत्यधिक रहेको जानकारी उनले दिए ।

पोखराकै हेम्जामा द अम्मट बिचमा रमेश कार्कीले ३ रोपनीमा लगाएको तरबुजा राम्रो फलेको छ । उत्पादन हेर्दा यस क्षेत्रमा राम्रै तरबुजा फलाउन सकिने देखिएको कार्कीले जानकारी दिए ।

गएको वर्ष सामान्य परीक्षणको रूपमा १०/१२ रोपनीमा मात्र गरिएको तरबुजा खेती यस वर्ष भने २०० रोपनीमा विस्तार भएको पोखरा महानगरपालिका कृषि विकास शाखा प्रमुख मनहर कडरियाले जानकारी दिए । तरबुजा खेतीका लागि महानगरपालिकाले बीउ तथा मलचिङमा महानगरले सहयोग गरेको उनले जानकारी दिए ।

महानगरपालिका–१३, २३, ३०, ३२, ३३ मा यसको खेतीतर्फ आकर्षण बढिरहेको जानकारी दिँदै उनले स्थानीय रूपमा उत्पादित तरबुजाको स्वाद पनि निकै मीठो रहेको बताए । पोखरामा यस वर्ष करिब ४०० टन (लगभग २ करोड रूपैयाँ बराबर) को तरबुजा उत्पादन भएको उनले जानकारी दिए ।

महानगरपालिकाले पोखरामा उत्पादित सरस्वती जातको खरबुजाको ‘ब्रान्डिङ’ र बजारीकरणका लागि स्टिकर तयार गरेको जानकारी कडरियाले दिए ।

स्थानीय उत्पादन प्रोत्साहन गर्न तरबुजा मेला

स्थानीय उत्पादनलाई प्रोत्साहन गर्ने लक्ष्यका साथ पोखरामा बिहीवार तरबुजा मेला २०८२ गरिएको छ ।

वडास्तरीय कृषि सञ्जाल पोखरा–१३ को व्यवस्थापन र पोखरा महानगरपालिकाको कृषि विकास शाखाको सहकार्यमा सञ्चालित मेलामा तरबुजा प्रदर्शनी, निःशुल्क स्वाद परीक्षण, प्राविधिक जानकारी आदानप्रदान, सफल किसानका अनुभव साझा, परिकार प्रदर्शनी तथा बाली उपचार शिविरसमेत सञ्चालन गरिएको पोखरा महानगरपालिका–१३ का वडा अध्यक्ष किरण बरालले जानकारी दिए ।

कृषकको मेहनत र पसिनाको फललाई प्रवर्द्धन गर्ने लक्ष्यसहित कार्यक्रम तय गरिएको बताउँदै उनले कृषि उत्पादनमा प्रोत्साहन गर्दै आत्मनिर्भरता अभिवृद्धि गर्ने लक्ष्य राखिएको बताए ।

फल्यो करिब ८ किलोको तरबुजा

मेलाका अवसरमा ल्याइएका तरबुजामध्ये पोखरा–३३ सुरौदीको तिखेढुङ्गामा लगाइएको तरबुजा एउटैको ७ किलो ८६० ग्राम तौलको पाइएको छ । 

प्रदर्शनीमा कृषि फर्म तथा व्यक्तिगत रूपमा तरबुजा खेती गर्नेहरूका उत्पादनलाई तौल गरिएकोमा रमेश आचार्य र ज्ञानबहादुर कार्कीले तिखेढुङ्गामा लगाएको तरबुजा सबैभन्दा बढी तौलको प्रमाणित गरिएको हो । मेलाका अवसरमा ठूलो तौलको फलाएवापत उनीहरूलाई ५ हजार रूपैयाँ नगदसहित पुरस्कृत गरिएको थियो ।

मेलामा गरिएको तरबुजा खाने प्रतियोगितामा रवि बराल र विमला श्रेष्ठ पहिलो र दोस्रो भए । उनीहरूलाई पुरस्कारस्वरूप ९ किलोग्राम र ६ किलोग्राम तरबुजा प्रदान गरिएको थियो ।

प्रदर्शनीमा उत्कृष्ट हुने मणिद्विप कृषि फर्म पोखरा-१३ आर्वाका श्रीधरलाल बराल र रोशन बराल प्रथम भए भने पिपलडाली पशु तथा कृषक समूह पोखरा-२८ का शोवितबहादुर अधिकारी दोस्रो भए । सूर्यचन्द्र कृषक समूह पोखरा-१३ दुईकुलाको मुहानका विश्वराज सापकोटा तेस्रो र चण्डेश्वरी कृषि सहकारी संस्था लिमिटेड पोखरा-१३ साझाका रामकाजी बरालले सान्त्वना स्थान प्राप्त गरे । 

प्रथम, द्वितीय, तृतीय र सान्त्वना स्थान प्राप्त गर्ने फर्मलाई क्रमशः ५ हजार, ४ हजार, ३ हजार र १ हजार रुपैयाँ नगदसहित पुरस्कृत गरिए । रासस