काठमाडौं । प्रभु म्युचुअल फण्डअन्तर्गत सञ्चालित प्रभु सेलेक्ट फण्ड र प्रभु स्मार्ट फण्डले भदौ मसान्तसम्मको खुद सम्पत्ति मूल्य विवरण सार्वजनिक गरेका छन् । उक्त वित्तीय विवरण अनुसार यी दुवै फण्डले सूचीकृत धितोपत्रमा लगानी बढाएका छन् ।
प्रभु सेलेक्ट फण्डले साउन मसान्तसम्ममा सूचीकृत धितोपत्रमा रू. ७१ करोड ५७ लाख लगानी गरेकोमा भदौ मसान्तमा बढाएर रू. ७४ करोड ५८ लाख पुगेको छ । त्यस्तै प्रभु स्मार्ट फण्डले साउन मसान्तसम्ममा सूचीकृत धितोपत्रमा रू. ४५ करोड २५ लाख लगानी गरेकोमा भदौ मसान्तमा बढाएर रू. ५० करोड ४६ लाख पुर्याएको हो ।
यस फण्डको न्याभ भने साउनको तुलनामा भदौमा घटेको छ । साउन मसान्तमा फण्डको न्याभ १० रुपैयाँ ५४ पैसा रहेकोमा भदौ मसान्तमा १० रुपैयाँ ४५ पैसा कायम भएको हो । फण्डले भदौ मसान्तसम्ममा रू. ७६ लाख १५ हजार नोक्सानी व्यहोरेको छ । साउन मसान्तमा पनि फण्ड रू. १० लाख ४२ हजार नोक्सानीमा थियो ।
प्रभु सेलेक्ट फण्ड पनि भदौ मसान्तसम्ममा रू. २ करोड २४ लाख नोक्सानीमा छ । साउन मसान्तमा पनि फण्ड रू. १ करोड २२ लाख नोक्सानीमा थियो । त्यस्तै फण्डको न्याभ साउन मसान्तमा १० रुपैयाँ ९० पैसा रहेकोमा भदौ मसान्तमा १० रुपैयाँ ८२ पैसा कायम भएको हो ।
