चितवन । पुलचोक–गोन्द्राङ सडकलाई ६ लेनमा विस्तार गर्ने काम अन्तिम चरणमा पुगेको छ । सडक डिभिजन भरतपुरका अनुसार ९५ प्रतिशतभन्दा बढी काम सकिएको हो । अहिले सडकका डिभाइडरमा रङ लगाउने, लाइनिङ गर्ने, बत्ती जडान गर्ने लगायत फिनिसिङका काम भइरहेको छ । तेस्रोपटक थपिएको म्यादमा सडक विस्तारको काम सम्पन्न हुने भएको छ । सडक विस्तारको म्याद यही पुस मसान्तसम्म रहेको छ ।

‘फिनिसिङ हुँदै छ, अर्काे लेयरको इनामेल पेन्ट्स लगाउने काम भइरहेको छ । ‘भाटभटेनी सुपरमार्केट अगाडि एक तहको कालोपत्र हुन बाँकी छ,’ सडक डिभिजन भरतपुरकी इन्जिनियर शिला न्यौपानेले भनिन्, ‘अब धेरै काम बाँकी छैन । भुक्तानीका लागि निर्माण व्यवसायीले बिल पेस गर्न बाँकी छ, दशैं पछाडि हामीले भुक्तानी दिएका छैनौं । त्यतिबेला ९० प्रतिशतजति भुक्तानी गरिसकेका थियौं,’ उनले भनिन् । निर्माण व्यवसायीलाई दिन थप आठ करोड रुपैयाँ सरकारसँग माग गरिएको उनले बताइन् ।

पूर्व–पश्चिम राजमार्गअन्तर्गत पर्ने यस सडकमा दुईओटा एक्सप्रेस लेन र दुईओटा सर्भिस लेन बनाइएका छन् । सडक विस्तारका क्रममा भरतपुर ओरालोको उचाइ घटाइएको छ । सडक विस्तारको जिम्मा पाएको इण्डो सगुन जेभीका इन्जिनियर सुनिल ढुंगानाका अनुसार भरतपुर ओरालोको उचाइ ६० सेन्टिमिटरदेखि १ दशमलव २ मिटरसम्मले घटाइएको हो । 

यो सडक विस्तारको लागत १ अर्ब ७६ करोड रुपैयाँ रहेको छ । सडकको दायाँ–बायाँ ११ दशमलव ५ मिटरको एक्सप्रेस लेन रहेको छ । त्यसको बीचमा ३ देखि ४ मिटरको मेडियन छ, जहाँ दुबो र बिरुवा लगाइसकिएको छ ।

एक्सप्रेस लेनको छेउमा दुवैतर्फ ठूला नाली छन् । नालीभन्दा बाहिर दुवैतर्फ ६ मिटरसम्मको सर्भिस लेन रहेको छ । सर्भिस लेनबाहिर दुवैतर्फ ३ देखि ४ मिटरको फुटपाथ रहेको छ । बजार क्षेत्रमा सर्भिस लेनमा मात्र नभई एक्सप्रेस लेनमै समेत सवारीसाधन पार्किङ गरिँदा बजार अव्यवस्थित बनेको छ । एक्सप्रेस लेन लामो दूरीका सवारीसाधन र सर्भिस लेन छोटो दूरीका सवारीसाधन सञ्चालनका लागि निर्माण गरिएको हो ।