काठमाडौं । नेपाल र थाइल्याण्डबीच विभिन्न आठ समझदारीपत्रमा हस्ताक्षर भएको छ । प्रधानमन्त्री केपी शर्मा ओलीको थाइल्याण्डको औपचारिक भ्रमणका क्रममा बुधवार दुई देशका सरकारी पक्षबीच दुईओटा र गैरसरकारी पक्षबीच ६ ओटा समझदारीपत्रमा हस्ताक्षर भएको हो ।

दुवै देशका प्रधानमन्त्रीको उपस्थितिमा सरकारी तवरबाट संस्कृति तथा पर्यटनका क्षेत्रमा दुईओटा समझदारीपत्रमा हस्ताक्षर भएको छ । नेपाल सरकारको तर्फबाट परराष्ट्रमन्त्री डा. आरजु राणा देउवा र थाइल्याण्डका संस्कृतिमन्त्री सुडवान वाङसुफाकिज्कोसोलले सांस्कृतिक क्षेत्रमा सहकार्यसम्बन्धी समझदारीपत्रमा हस्ताक्षर गरे ।

त्यस्तै, परराष्ट्रमन्त्री डा. देउवा र थाइल्याण्ड सरकारका पर्यटन तथा खेलकुदमन्त्री सोरावाङ तियनथोङले पर्यटन क्षेत्रमा सहकार्यसम्बन्धी समझदारीपत्रमा हस्ताक्षर गरेका छन् । दुवै देशका प्रधानमन्त्रीको उपस्थितिमा नेपाल र थाइल्याण्डका गैरसरकारी क्षेत्रहरूबीच विभिन्न छ ओटा समझदारीपत्रमा हस्ताक्षर भएका छन् । यसमा नेपाल नेत्र ज्योति संघ र थाइल्याण्डको महिदोल विश्वविद्यालयअन्तर्गतको रामाथिवोदी अस्पतालबीच सहकार्यसम्बन्धी समझदारीपत्रमा हस्ताक्षर भएको छ । उक्त समझदारीपत्रमा नेपाल नेत्रज्योति संघका अध्यक्ष प्राडा. चेतराज पन्त र महिडोल युनिभर्सिटीका चिकित्सा संकाय, रामाथिबोडी अस्पतालका डिन प्राध्यापक आर्टिट उंकानन्तले हस्ताक्षर गरे । त्यस्तै, जनता एग्रो एन्ड फरेस्ट्री नेपाल (जेएएफएल) र कासेटसार्ट विश्वविद्यालय थाइल्याण्डबीच सम्झौतापत्रमा हस्ताक्षर भएको छ । काठमाडौं विश्वविद्यालय र थाइल्याण्डको सियाम विश्वविद्यालय सहकार्यसम्बन्धीपत्रमा पनि हस्ताक्षर भएको छ ।

उक्त समझदारीले नेपाल र थाइल्याण्डबीच व्यापारिक सम्बन्ध सुदृढ गर्ने, आर्थिक सहकार्य प्रवर्द्धन गर्ने तथा व्यापार र लगानी विस्तारका लागि संरचित रूपरेखा तयार गर्ने लक्ष्य राखेको छ ।

समझदारीपत्रमा हस्ताक्षर समारोहअघि प्रधानमन्त्री ओली र थाइल्याण्डका प्रधानमन्त्री पे थोङ् थान् सिनावात्राबीच भेटवार्ता भएको थियो । सो अवसरमा राजनीतिक तथा द्विपक्षीय सम्बन्ध, व्यापार तथा आर्थिक सहकार्य, उड्डयन, पर्यटन तथा संस्कृति, विकास सहकार्य तथा क्षेत्रीय र बहुपक्षीय मुद्दाका सम्बन्धमा छलफल भएको थियो ।

भेटवार्तापछि आयोजित संयुक्त पत्रकार सम्मेलनमा प्रधानमन्त्री ओलीले यस भ्रमणबाट दुई मुलुकबीच पर्यटन, ऊर्जा, संस्कृति, शिक्षालगायत क्षेत्रमा सहकार्य बढ्ने विश्वास व्यक्त गरे । नेपालमा होटल व्यवसाय तथा हवाई सेवाजस्ता पर्यटन क्षेत्रमा थाइल्याण्डको लगानी र व्यापारका विषयले आगामी दिनमा प्राथमिकता पाउने विश्वास उनले व्यक्त गरे । प्रधानमन्त्री ओलीको भ्रमण दलमा प्रथम महिला राधिका शाक्य, परराष्ट्रमन्त्री डा. आरजु राणा देउवा, प्रधानमन्त्रीका मुख्य सल्लाहकार विष्णुप्रसाद रिमाल, आर्थिक/विकास सल्लाहकार डा. युवराज खतिवडा, नेपाल सरकारका मुख्यसचिव एकनारायण अर्याल, परराष्ट्र मन्त्रालयका सचिव अमृतबहादुर राईका साथै निजीक्षेत्रका संघसंस्थाका प्रतिनिधिहरू छन् ।

महासंघ र बोर्ड अफ ट्रेडबीच सहकार्यको समझदारी

नेपाल उद्योग वाणिज्य महासंघ र थाइल्याण्डको थाई चेम्बर अफ कमर्स एन्ड बोर्ड अफ ट्रेडबीच आपसी सहकार्य तथा व्यापार–व्यवसाय अभिवृद्धिका लागि समझदारी भएको छ । दुवै देशका प्रधानमन्त्रीको उपस्थितिमा बुधवार बैंककमा भएको समझदारीपत्रमा नेपाल उद्योग वाणिज्य महासंघ अध्यक्ष चन्द्रप्रसाद ढकाल र थाई चेम्बर अफ कमर्स एन्ड बोर्ड अफ ट्रेड अध्यक्ष सानन अंगुबोल्कुलले हस्ताक्षर गरेका छन् ।

उक्त समझदारीले नेपाल र थाइल्याण्डबीच व्यापारिक सम्बन्ध सुदृढ गर्ने, आर्थिक सहकार्य प्रवर्द्धन तथा व्यापार र लगानी विस्तारका लागि संरचित रूपरेखा तयार गर्ने लक्ष्य राखेको छ । त्यस्तै दुई देशबीचको व्यापारिक सहकार्य थप मजबूत बनाउने र आर्थिक सहकार्य विस्तार गर्न महत्त्वपूर्ण योगदान गर्ने विश्वास गरिएको छ । द्विपक्षीय समझदारी अन्तर्गत दुवै पक्षले व्यापार प्रवर्द्धन, संयुक्त उद्यम सुविधा, व्यापारिक जानकारी आदान–प्रदान र औद्योगिक सहकार्यलाई समर्थन गर्ने प्रतिबद्धता व्यक्त गरेका छन् । महासंघ अध्यक्ष ढकालले नेपाल–थाइल्याण्डबीच भएको समझदारीले दुई देशबीच आर्थिक सहकार्यका लागि नयाँ आधारशिला तयार गरेको धारणा राखे ।

परिसंघ–थाई उद्योग महासंघ सहकार्य

नेपाल उद्योग परिसंघ र थाई उद्योग महासंघ (एफटीआई)बीच लगानी प्रवर्द्धन तथा सहकार्यसम्बन्धी समझदारी भएको छ । प्रधानमन्त्री केपी शर्मा ओलीको औपचारिक थाइल्याण्ड भ्रमणका क्रममा बुधवार दुई देशका यी दुई संस्थाबीच लगानी प्रवर्द्धन, आर्थिक तथा व्यावसायिक सम्बन्ध विस्तारका लागि समझदारी भएको हो ।

समझदारीपत्रमा परिसंघका अध्यक्ष राजेशकुमार अग्रवाल र एफटीआईका अध्यक्ष क्रियेंग्राई थेननुकुलले हस्ताक्षर गरेका छन् । ‘लगानी तथा व्यापार प्रवर्द्धनसँगै आर्थिक तथा व्यापारसम्बन्धी अध्ययन, अनुसन्धान, तालीम तथा क्षमता विकास, कानूनी, नीतिगत विषयमा जानकारी आदान–प्रदानलगायतमा सहकार्य गर्न दुई संस्थाबीच समझदारी भएको हो,’ परिसंघद्वारा जारी प्रेस विज्ञप्तिमा भनिएको छ ।

विदेशी लगानीकर्ताका लागि नेपाल उपयुक्त गन्तव्य मुलुक भएकाले यो समझदारीले थाइल्याण्डको लगानी भित्त्याउन सहयोग गर्ने विश्वास परिसंघका अध्यक्ष अग्रवालले गरे । लगानी प्रवर्द्धन गर्न सहयोग गर्नेगरी सरकारले कानूनहरूमा सुधार गरेको र यसबाट लगानीकर्ताले फाइदा लिन सक्ने उनको भनाइ थियो ।