काठमाडौं । स्वरोजगार लघुवित्त वित्तीय संस्था लिमिटेडले फागुन १८ गतेदेखि सार्वजनिक निष्कासनमा ल्याएको एफपीओ खरीद गर्ने आज अन्तिम दिन रहेको छ । मागभन्दा बढी आवेदन परिसकेकाले छिटो फागुन २१ गतेसम्म मात्र विक्री खुला गर्न लागिएको हो । 

कम्पनीले प्रतिकित्ता १०० रुपैयाँ अंकित मूल्यका १ करोड ९५ लाख ७७ हजार ३०० रुपैयाँबराबरको १ लाख ९५ हजार ७७३ कित्ता एफपीओ जारी गरेकोे हो । कम्पनीको एफपीओ खरीदका लागि न्यूनतम १० कित्तादेखि अधिकतम १ हजार कित्तासम्म माग गर्न सकिने व्यवस्था छ ।

यो एफपीओ निष्कासन तथा विक्री प्रबन्धकमा एनएमबि क्यापिटल लिमिटेड रहेको छ । लगानीकर्ताहरूले विक्री प्रबन्धकसँगै नेपाल धितोपत्र बोर्डबाट स्वीकृति प्राप्त गरेका सम्पूर्ण सि–आस्बा सदस्य बैंक तथा वित्तीय संस्थाहरू र तिनका तोकिएका कार्यालयमार्फत आवेदन दिन सक्नेछन् । साथै मेरो शेयर अनलाइन मार्फत पनि आवेदन दिन सकिने व्यवस्था छ । 

यो कम्पनीले बैंक तथा वित्तीय संस्था सम्बन्धी ऐन, २०७३ बमोजिम २०६६ साल मंसिर १६ गते नेपाल राष्ट्र बैंकबाट वित्तीय कारोबार गर्न स्वीकृति पाई २०६६ साल पुस १ गतेदेखि राष्ट्रिय स्तरमा लघुवित्त सेवा प्रदान गर्दै आएको छ । यस कम्पनीले जनकपुर लघुवित्त वित्तीय संस्था लिमिटेडलाई प्राप्ति गरी २०७७ साल असोज २५ गतेदेखि एकीकृत कारोबार सुरु गरेको हो । हाल नेपालभरका तराई तथा पहाडी ३६ जिल्लाहरूमा यस कम्पनीले ९१ शाखा कार्यालयमार्फत १ लाख २९ हजारभन्दा बढी सदस्यहरूलाई सेवा प्रदान गर्दै आएको छ ।

अधिकृत पूँजी ८० करोड रुपैयाँ रहेको यस कम्पनीको जारी पूँजी ६९ करोड ६ लाख ८२ हजार रुपैयाँ रहेको छ । हाल कम्पनीको चुक्तापुँजी ६७ करोड ११ लाख ४ हजार रुपैयाँ छ । एफपीओ निष्कासन तथा बाँडफाँटपछि कम्पनीको चुक्तापूँजी ६९ करोड ६ लाख ८२ हजार रुपैयाँ कायम हुनेछ ।

एफपीओ पछि कम्पनीमा संस्थापकतर्फ ५२ दशमलव ७२ प्रतिशत र सर्वसाधारणतर्फ  ४७ दशमलव २८ प्रतिशत शेयर स्वामित्व कायम हुनेछ । यस कम्पनीले जनकपुर लघुवित्त वित्तीय संस्थालाई २०७७ साल असोज २५ गते १०० बराबर ७० को अनुपातमा शेयर आदानप्रदान गर्दै प्राप्ति गरेको थियो । प्राप्ति गरेको संस्था जनकपुर लघुवित्तले प्रारम्भिक सार्वजनिक निष्कासन नगरेको अवस्थामा निष्कासन हुन बाँकी शेयर एफपीओ मार्फत जारी गर्न लागिएको हो ।