काठमाडौं । नेपाल स्टक एक्सचेन्ज (नेप्से)मा उत्पादन तथा प्रशोधन समूहका ९ सूचीकृत कम्पनीहरूमध्ये आठ कम्पनीले चालू आर्थिक वर्ष (आव)को पहिलो त्रैमासिक वित्तीय विवरण सार्वजनिक गरेका छन् । नेपाल ल्यूब आयल लिमिटेडले भने हालसम्म चालू आवको पहिलो त्रैमासिक वित्तीय विवरण सार्वजनिक गरेको छैन । 

वित्तीय विवरण सार्वजनिक गरेका ८ कम्पनीहरूमध्ये तीन कम्पनी घाटामा छन् भने बाँकी पाँच कम्पनी नाफामा छन् । सर्वोत्तम सिमेन्ट, सोनापुर मिनरल्स एण्ड आयल लिमिटेड र घोराही सिमेन्ट इन्डष्ट्रि घाटामा छन् । 

पहिलो त्रैमासमा यी तीन कम्पनीमध्ये घोराही सिमेन्टले सबैभन्दा बढी रू. ५१ करोड ३७ लाख नोक्सानी व्यहोरेको छ । यो कम्पनी गत आवको पहिलो त्रैमासमा रू. १९ करोड ८८ लाख नोक्सानीमा थियो । पहिलो त्रैमासमा विक्री लागत बढेकाले र आम्दानी घटेकाले कम्पनी नोक्सानीमा रहेको हो । कम्पनीको विक्री लागत गत आवको पहिलो त्रैमासमा रू. १२ करोड ४९ लाख रहेकोमा चालू आवको सोही अवधिमा बढेर रू. २५ करोड २४ लाख पुगेको छ । 

त्यस्तै सिमेन्ट उद्योगको बजारमा मागभन्दा बढी उत्पादन भएकाले प्रतिस्पर्धात्मक स्थितिमा विक्रीमा अपेक्षा अनुसार वृद्धि नभएको कम्पनीले वित्तीय विवरणमा उल्लेख गरेको छ । गत आवमा कम्पनीको आम्दानी रू. ८८ करोड ८८ लाख रहेकोमा चालू आवमा रू. ६६ करोड ८४ लाखमा सीमित भएको छ । त्यस्तै सोनापुर मिनरल्सले पहिलो त्रैमासमा रू. ८ करोड ५५ लाख र सर्वोत्तम सिमेन्टले रू. २ करोड २५ लाख नोक्सानी व्यहोरेका छन् । 

नाफामा रहेका ४ कम्पनीहरूमध्ये युनिलिभर नेपाल, बोटलर्स नेपाल तराई र बोटलर्स नेपाल बालाजुको नाफा गत आवको पहिलो त्रैमासको तुलनामा चालू आवको सोही अवधिमा घटेको छ भने हिमालयन डिष्टिलरीको नाफा ८९ प्रतिशत वृद्धि भएको छ । यस कम्पनीले गत आवमा रू. १० करोड ५१ लाख नाफा कमाएकोमा चालू आवमा रू. १९ करोड ८८ लाख कमाएको छ । 

पहिलो त्रैमासमा सबैभन्दा बढी नाफा कमाउनेमा युनिलिभर नेपाल छ । कम्पनीले सो अवधिमा रू. ५२ करोड ६९ लाख नाफा कमाएको हो । यो नाफा गत आवको पहिलो त्रैमासको तुलनामा ४ प्रतिशत कम हो । गत आवको सो अवधिमा कम्पनीले रू. ५५ करोड २५ लाख नाफा कमाएको थियो । 

त्यस्तै बोटलर्स नेपाल बालाजुले चालू आवको पहिलो त्रैमासमा रू. ८ करोड ४३ लाख र बोटलर्स नेपाल तराईले रू. ८ करोड १८ लाख नाफा कमाएको छ । 

कम्पनीको नाम	खुद नाफा/नोक्साान रू. हजारमा
	चालू आवको पहिलो त्रैमास	गत आवको पहिलो त्रैमास
युनिलिभर नेपाल	526,900	552,500	-4.63
हिमालयन डिष्टीलरी	198,871	105,199	89.04
बोटलर्स नेपाल बालाजु	84,383	105,305	-19.87
बोटलर्स नेपाल तराई	81,807	133,036	-38.51
शिवम सिमेन्ट	12,799	-53,420	-
सर्वोत्तम सिमेन्ट	-22,584		-
सोनापुर मिनरल्स एण्ड आयल लिमिटेड	-85,532		-
घोराही सिमेन्ट इण्डष्ट्री	-513,774	-198,823	-

स्रोत : सम्बन्धित कम्पनीले प्रकाशित गरेको चालू आवको पहिलो त्रैमासिक वित्तीय विवरण ।