काठमाडौं । विन नेपाल लघुवित्त वित्तीय वित्तीय संस्था लिमिटेडले चैत २१ गतेदेखि थप सार्वजनिक निष्कासन (एफपीओ) जारी गर्ने भएको छ । माघ ३० गते नेपाल धितोपत्र बोर्डबाट एफपीओ जारी गर्न अनुमति पाएको कम्पनीले सर्वसाधारणतर्फको हिस्सा ३० प्रतिशत कायम गर्न एफपीओ निष्कासन गर्न लागेको हो । कम्पनीले प्रतिकित्ता १०० रुपैयाँ अंकित मूल्यमा ५१ लाख २९ हजार २५० रुपैयाँबराबरको ५१ हजार २९२ दशमलव ५ कित्ता एफपीओ निष्कासन गर्नेछ । यो एफपीओे निष्कासन मिति छिटोमा चैत २६ गतेसम्मका लागि तय गरिएको छ ।

छिटो अवधिभित्र माग बमोजिम आवेदन नपरेमा भने ढिलो अवधि २०८२ साल वैशाख ४ गतेसम्म निष्कासन लम्बिनेछ । तर पछिल्लो समय आईपीओ तथा एफपीओमा पहिलो दिनमै मागभन्दा बढी आवेदन परेको तथ्याङ्क छ । यसलाई आधार मान्दा कम्पनीको एफपीओ पनि छिटो अवधि चैत २६ गतेसम्म मात्र निष्कासनमा रहने निश्चित छ । आवेदन दिँदा न्यूनतम १० कित्तादेखि  अधिकतम १ हजार कित्तासम्मका माग गर्न सकिनेछ ।यो एफपीओ निष्कासन तथा बिक्री प्रबन्धकमा नेपाल एसबिआई मर्चेण्ट बैंकिङ्ग लिमिटेड रहेको छ। 

विक्री प्रबन्धकसँगै नेपाल धितोपत्र बोर्डबाट स्वीकृत प्राप्त सम्पूर्ण सि–आस्बा सदस्य बैंक तथा वित्तीय संस्था र तिनका तोकिएका कार्यालयबाट आवेदन दिन पाइनेछ । साथै मेरो शेयर अनलाइन मार्फत समेत आवेदन दिन सकिने व्यवस्था छ । एफपीओ निष्कासन प्रयोजनका लागि गराइएको रेटिङ्गमा क्रेडिट रेटिङ्ग कम्पनी केयर रेटिङ्ग नेपालले वित्तीय दायित्व बहन गर्ने क्षमतामा उच्च जोखिम रहेको संकेत गर्ने केयर एनपी सिंगल बी इस्यूअर रेटिङ्ग प्रदान गरेको छ। रेटिङ्गलाई ध्यानमा राखेर पनि लगानीकर्ताले कम्पनीको एफपीओ खरीद गर्न उपयुक्त छ छैन वारे निर्णय लिन सक्नेछन् ।
कम्पनीको परिचयः  
विन नेपाल लघुवित्त वित्तीय संस्था लिमिटेड कम्पनी ऐन, २०६३ बमोजिम २०७० साल मंसिर १६ गते कम्पनी रजिष्ट्रारको कार्यालयमा पब्लिक लिमिटेड कम्पनीको रुपमा दर्ता भएको थियो । बैंक तथा वित्तीय संस्था सम्बन्धी ऐन, २०७३ बमोजिम भने यो कम्पनीले २०७१ साल साउन २१ गते वित्तीय कारोबार गर्न स्वीकृति पाएको थियो । राष्ट्र बैंकको स्वीकृति पछि यो कम्पनीले २०७१ साल मंसिर ८ गतेदेखि लघुवित्त सेवा प्रदान गर्दै आएको छ । यस कम्पनीले नेपाल सेवा लघुवित्त वित्तीय संस्थासँग मर्जर प्रक्रिया पुरा गरी २०७८ साल कात्तिक १५ गतेदेखि एकीकृत कारोबार सुरु गरेको हो ।

कम्पनीको केन्द्रिय कार्यालय काभ्रेपलाञ्चोक, बनेपामा रहेको छ । बाग्मती प्रदेश स्तरीय कार्यक्षेत्र रहेको कम्पनीले हाल केन्द्रिय कार्यालय सहित २१ ओटा शाखा कार्यालयमार्फत सेवा प्रदान गरिरहेको छ । यस अघि सर्वसाधारणमा आईपीओ जारी गरिसकेको यस कम्पनीले थप शेयर जारी गर्न लागेको हो । सर्वसाधारणमा कम्पनीले २०७५ साल वैशाख १२ गतेदेखि १६ गतेसम्म आईपीओ निष्कासन गरी वैशाख २३ गते बाँडफाँट गरेको थियो । धितोपत्र दोस्रो बजारमा २०७५ साल जेठ १७ गते कम्पनी सूचीकृत भएको थियो ।
पूँजी संरचना ः
१५ करोड रुपैयाँ अधिकृत पूँजी रहेको कम्पनीको जारी पूाजी ८ करोड ४३ लाख ४० हजार ५५० रुपैयाँ छ । हाल कम्पनीको चुक्तापूँजी ७ करोड ९२ लाख ११ हजार ३०० रुपैयाँ रहेको छ । एफपीओ निष्कासन तथा बाँडफाँटपश्चात्कम्पनीको चुक्ता पूँजी ८ करोड ४३ लाख ४० हजार ५५० रुपैयाँ कायम हुनेछ । कम्पनीमा संस्थापकतर्फ एफपीओपछि ७० प्रतिशत र सर्वसाधारणतर्फ ३० प्रतिशत शेयर स्वामित्व कायम हुनेछ ।

एफपीओ निष्कासपश्चात् प्राप्त पूँजीको उपयोग नेपाल राष्ट्र बैंकको निर्देशन तथा कम्पनीको आन्तरिक नीतिको अधिनमा रही विभिन्न शिर्षकमा लगानी गर्ने योजना कम्पनीको छ । कम्पनीका अनुसार २ करोड रुपैयाँ पशुपालन तथा कृषि कर्जामा,१५ लाख ६५ हजार ८०० रुपैयाँ खुद्रा व्यापार तथा सेवा कर्जा शिर्षकमा र १५ लाख ६३ हजार ४५० रुपैयाँ साना तथा घरेलु उद्योग कर्जा शिर्षकमालगानी हुनेछ ।
वित्तीय अवस्था ः
यो कम्पनी सञ्चित नोक्सानीमा रहेको देखिन्छ । आर्थिक वर्ष ०७८/७९ मा १ करोड ५ लाख रुपैयाँ सञ्चित नोक्सानीमा रहेको कम्पनी आर्थिक वर्ष ०७९/८० मा भने १ करोड ९६ लाख रुपैयाँभन्दा बढी सञ्चित नोक्सानीमा रहेको थियो । गत आर्थिक वर्ष ०८०/८१ सम्म भने कम्पनी १ करोड ६१ लाख रुपैयाँभन्दा बढी सञ्चित नोक्सानीमा रहेको छ । चालू आर्थिक वर्षको पौष मसान्तसम्म भने कम्पनीको सञ्चित नोक्सानी बढेर २ करोड ८६ लाख रुपैयाँभन्दा बढी कायम भएको छ । चालू आर्थिक वर्षको अन्त्यसम्म कम्पनीले सञ्चित नोक्सानी घटाएर ३४ लाख ८३ हजार रुपैयाँमा झार्ने प्रक्षेपण गरेको छ ।
लाभांश वितरणको अवस्था ः
कम्पनीले हालसम्म एक आर्थिक वर्षमा मात्र लाभांश वितरण गरेको देखिन्छ । आर्थिक वर्ष ०७७/७८ को मुनाफाबाट कम्पनीले ९ दशमलव ३३ प्रतिशत बोनस शेयर र कर प्रयोजनका लागि शून्य दशमलव ५ प्रतिशत नगद लाभांश वितरण गरको थियो । त्यसपछिका वर्षहरुमा कम्पनीले लाभांश वितरण गरेको छैन् । गत आर्थिक वर्षको दशौं वार्षिक साधारण सभा गत पुस २९ गतेनै सम्पन्न गरेको कम्पनीले अन्य कुनै लघुवित्त वित्तीय संस्थासँग मर्जर तथा प्राप्तिमा जान सक्ने सम्भावनालाई औल्याउँदै सम्पूर्ण अख्तियारी सञ्चालक समितिलाई प्रदान गरेको छ ।
सञ्चालक समिति  ः
यस कम्पनीमा ६ सदस्यीय सञ्चालक समिति रहेको छ । मदन गोपाल श्रेष्ठ अध्यक्ष रहेका छन् भने सञ्चालकहरुमा कुमार राज जोशी , सुकुमान डंगोल, रमादेवि श्रेष्ठ, एन्जिला न्यौपाने र राजु केसी रहेका छन् । अध्यक्ष श्रेष्ठसँग यस कम्पनीमा अध्यक्ष पदमा रहेर ९ वर्ष काम गरेको अनुभव छ । कुमार राज जोशी र सुकुमान डंगोल पनि ९ वर्षदेखि सञ्चालक पदमा रही काम गरिरहेका छन् । त्यस्तै रमादेवि श्रेष्ठ र एन्जिला न्यौपाने चार वर्षदेखि सञ्चालक पदमा छन् भने राजु केसी एक वर्षदेखि सञ्चालक पदमा रहेका छन् ।
कति पाउला कम्पनीको एफपीओले पहिलो कारोबार मूल्य ?
आईपीओको सम्बन्धमा कम्पनीको वास्तविक प्रतिशेयर नेटवर्थदेखि त्यसको तीन गुणासम्मको मूल्य रेञ्ज धितोपत्र दोस्रो बजारले पहिलो कारोबारका लागि तोक्ने गर्दछ । एफपीओ सूचीकृत पछिको कारोबारका लागि भने कम्पनीको सो समयमा कायम अन्तिम मूल्यनै निर्धारण हुनेछ । चैत १९ गते कम्पनीको अन्तिम शेयरमूल्य प्रतिकित्ता २ हजार ९८९ रुपैयाँ कायम भएको छ । मानौ कम्पनीको एफपीओ सूचीकृत समयमा यहि मूल्य कायम रहेमा एक हजार रुपैयाँ लगानी गरेका लगानीकर्ताले पहिलो दिनमै २ हजार ८०० रुपैयाँभन्दा बढी फाइदा कमाउनेछन् ।