काठमाडौं । एफपीओ निष्कासन गरेका तीनओटा बीमा कम्पनीले सरकारलाई रू. १ अर्ब ४१ करोडभन्दा बढी कर तिर्नुपर्ने देखिएको छ ।

अर्थमन्त्री डा. प्रकाशशरण महतले आर्थिक वर्ष ०८०/८१ को बजेटमार्फत एफपीओबाट प्राप्त आम्दानीमा कर लगाउने घोषणा गरेसँगै एफपीओ निष्कासन गरेका नेपाल लाइफ इन्स्योरेन्स, प्रिमियर इन्स्योरेन्स र शिखर इन्स्योरेन्सले सरकारलाई रू. १ अर्ब ४१ करोड ४ लाख ६७ हजार १४५ तिर्नुपर्ने देखिएको हो ।

अब एफपीओ निष्कासन गरेका कम्पनीले प्रिमियमबापत संकलन गरेको रकमबाट शेयर प्रिमियम रकम घटाएर आएको रकमको ३० प्रतिशत सरकारलाई कर तिर्नुपर्ने भएको छ ।

एफपीओ निष्कासन गरेका तीनओटा कम्पनीको शेयर प्रिमियम शीर्षकमा कुल रू. ४ अर्ब ७० करोड १५ लाख ५७ हजार १५३ छ । यो रकममा प्रिमियमबापत उठेको कुल रकमलाई घटाएर आएको रकमको ३० प्रतिशत रू. १ अर्ब ४१ करोड ४ लाख ६७ हजार १४५ हुन्छ ।

कुन कम्पनीको कति ?

तीन इन्स्योरेन्स कम्पनीमध्ये नेपाल लाइफले महँगो मूल्यमा एफपीओ जारी गरेको थियो । यस कम्पनीले प्रतिकित्ता १ हजार ४२५ रुपैयाँमा ३० लाख ९६ हजार ४ सय २९ कित्ता एफपीओ विक्री गरेको थियो । कम्पनीले अंकित मूल्यमा १ सय रुपैयाँमा १ हजार ३२५ रुपैयाँ प्रिमियम थप गरी एफपीओ निष्कासन गरेको थियो । कम्पनीले प्रिमियमबापत रू. ४ अर्ब १० करोड २७ लाख ६८ हजार ४२५ रकम संकलन गरेको थियो । कम्पनीको ०७७/०७८ को वार्षिक वित्तीय विवरण अनुसार शेयर प्रिमियममा रू. ४ करोड ७१ लाखभन्दा बाँकी छ । यस आधारमा कम्पनीले प्रिमियमबापत संकलन गरेको रकममा शेयर प्रिमियम घटाउँदा आउने रू. ४ अर्ब ५ करोडको ३० प्रतिशत कर रू. १ अर्ब २१ करोडभन्दा बढी हुन्छ ।

त्यस्तै साविकको प्रिमियर इन्स्योरेन्सले प्रतिकित्ता ७९९ रुपैयाँमा ६ लाख ५९ हजार ५६५ कित्ता एफपीओ विक्री गरेको थियो । कम्पनीले अंकित मूल्य १ सय रुपैयाँमा ६९९ रुपैयाँ थप गरी कूल रू. ४६ करोड १० लाख ३५ हजार ९३५ प्रिमियम संकलन गरेको थियो । कम्पनीको २०७८/७९ को वार्षिक प्रतिवेदन अनुसार कम्पनीको शेयर प्रिमियममा रू. ४ लाख ७५ हजार छ । एफपीओ निष्कासनपश्चात संकलन गरेको प्रिमियममा शेयर प्रिमियम रकम घटाउँदा आएको रकमको ३० प्रतिशत कर रू. १३ करोड ८१ लाख ६८ हजार हुन आउँछ ।

त्यसैगरी शिखर इन्स्योरेन्सले प्रतिकित्ता ६५० रुपैयाँमा ५ लाख १० हजार ९८८ कित्ता शेयर विक्री गरेको थियो । कम्पनीले अंकित मूल्य १ सय रुपैयाँमा ५५० रुपैयाँ थप गरी कूल रू. २८ करोड १० लाख ४३ हजार ४ सय प्रिमियम संकलन गरेको थियो । आर्थिक वर्ष २०७८/०७९ को वार्षिक वित्तीय विवरण अनुसार कम्पनीको शेयर प्रिमियम रू. ९ करोड ५७ छ । एफपीओ निष्कासनपश्चात संकलन गरेको प्रिमियममा शेयर प्रिमियम रकम घटाउँदा आउने रकमको ३० प्रतिशत रू. ५ करोड ५५ लाख ९९ हजारभन्दा बढी हुन आउँछ ।

हेर्नुस् तालिका

कम्पनीको नाम	एफपीओ कित्ता	शेयर मूल्य रू.	थप प्रिमियम मूल्य रू.	प्रिमियम रकम (रू. हजारमा)	शेयर प्रिमियममा बाँकी रहेको रकम (रू हजारमा)	तिर्नुपर्ने कर योग्य रकम (रू. हजारमा)	तिनुपर्ने कर रकमको ३० प्रतिशत (रू. हजारमा)
नेपाल लाइफ इन्स्योरेन्स	3,096,429	1,425	1,325	4,102,768	47,101	4,055,666	1,216,700
प्रिमियर इन्स्योरेन्स	659,565	799	699	461,035	475	460,560	138,168
शिखर इन्स्योरेन्स	510,988	650	550	281,043	95,712	185,330	55,599
कुल				4,844,846	143,288	4,701,556	1,410,467

स्रोत : कम्पनीको सूचनाबाट ।

Shikhar Insurance Co. Ltd. (SICL)

Shikhar Insurance Co. Ltd. (SICL)