काठमाडौं । बैंक, वित्तीय संस्थाहरूको वित्तीय अवस्था समग्रमा खस्केका बेला वित्त कम्पनीहरूको अवस्था तुलनात्मक रूपमा थप बिग्रिएको तिनीहरूको वित्तीय विवरणले देखाएको छ । 

चालू आर्थिक वर्ष (आव)२०८१/८२ को दोस्रो त्रैमासको वित्तीय विवरण सार्वजनिक गरेका १५ वित्त कम्पनीमध्ये सातओटा घाटामा छन् । आठ कम्पनीले यस अवधिमा नाफा कमाएका छन् । 

गोर्खाज, वेष्ट, गुहेश्वरी मर्चेण्ट एण्ड, समृद्धि, रिलायन्स, जानकी र पोखरा फाइनान्स दोस्रो त्रैमाससम्ममा घाटामा गएका हुन् । यीमध्ये गोर्खाज, वेष्ट, जानकी र पोखरा फाइनान्सले गत आवको दोस्रो त्रैमासमा नाफा कमाएका थिए । 

•  नाफा कमाउने कम्पनीको पहिलो नम्बरमा मञ्जुश्री फाइनान्स
•  सर्वाधिक निष्क्रिय कर्जा जानकी फाइनान्सको ४०.८८ प्रतिशत 

चालू आवमा सबैभन्दा बढी घाटा पोखरा फाइनान्सको छ । यसको ६ महीनाको घाटा ६३ करोड ७९ लाख रुपैयाँ नाघेको छ । त्यस्तै मञ्जुश्री फाइनान्सले सबैभन्दा धेरै ११ करोड ७० लाख रुपैयाँ नाफा कमाएको छ । दोस्रोमा आइसिएफसि फाइनान्सले १० करोड ९१ लाख रुपैयाँ नाफा कमाएको छ । 

१५ वित्त कम्पनीमध्ये दुईओटाको निष्क्रिय कर्जा घटेको छ भने बाँकी सबैको बढेको हो । प्रोग्रेसिभ र नेपाल फाइनान्सको यस्तो कर्जा घटेको हो । 

चालू आवको दोस्रो त्रैमाससम्ममा सबैभन्दा बढी निष्क्रिय कर्जा जानकी फाइनान्सको छ । यसको निष्क्रिय कर्जा ४० दशमलव ८८ प्रतिशत पुगेको छ । गत आवको यस अवधिमा जानकीको निष्क्रिय कर्जा १९ दशमलव ९९ प्रतिशत थियो । जानकी फाइनान्सका सूचना अधिकारी रोशन कपारले तीन जना राजनीतिक प्रभाव भएका व्यक्ति र ६ ठूला ऋणीमा गएका ऋणको नउठ्दा निष्किय कर्जा बढेको बताए । ‘उनीहरूबाट कर्जा उठ्ने बित्तिकै निष्किय कर्जा घट्नेछ ।’

दोस्रो धेरै निष्किय कर्जा पोखरा फाइनान्सको ३३ दशमलव ४४ प्रतिशत छ । उक्त कम्पनीका सूचना अधिकारी राजुमोहन भट्टराईका अनुसार ठूलो कर्जा नउठेका कारण निष्किय कर्जा बढेको हो । यसरी वित्तीय अवस्था बिग्रिएको पोखरा फाइनान्सले मर्जर तथा प्राप्ति प्रक्रियामा जान समिति गठन गरेको छ । 

कम्पनीले कुनै उपयुक्त बैंक, वित्तीय संस्थासँग मर्जर तथा प्राप्ति प्रक्रियामा जाने गरी २०७९ पुस २९ गते र २०८० पुस २९ गते सम्पन्न साधारणसभाबाट प्रस्ताव पारित गरेको थियो । सोही निर्णयबमोजिम कम्पनीले मर्जर तथा प्राप्ति प्रक्रिया अघि बढाउन माघ ९ गते मर्जर तथा प्राप्ति समिति गठन गर्ने निर्णय  गरेको हो । पोखरा फाइनान्सको स्थलगत निरीक्षणका क्रममा नेपाल राष्ट्र बैंकले यसलाई समस्याउन्मुख कम्पनीका रूपमा औंल्याएको थियो । राष्ट्र बैंकले यो कम्पनीलाई कारबाही गर्दै सञ्चालन समितिलाई सचेत समेत गराइसकेको छ ।