काठमाडौं । आइजीआई प्रुडेन्सियल इन्स्योरेन्स लिमिटेडले फागुन २५ गते २७औं वार्षिक साधारण सभा बोलाएको छ । माघ २९ गते बसेको कम्पनीको सञ्चालक समितिको बैठकले प्रस्तावित लाभांशसहित अन्य विविध प्रस्ताव पारितका लागि सभा गर्ने निर्णय गरेको हो । सभा काठमाडौंको नक्सालस्थित आम्रपालि बैंक्वेटमा बिहान १० बजे सुरु हुनेछ ।

यस वर्ष कम्पनीले गत आर्थिक वर्ष ०८०/८१ को मुनाफाबाट हाल कायम चुक्तापूँजी ३ अर्ब २ करोड ९३ लाख ३४ हजार रुपैयाँको आधारमा करसमेत ९ दशमलव ७४ प्रतिशत नगद लाभांश वितरण गर्ने प्रस्ताव गरेको छ । उक्त प्रस्तावलाई सभाले अन्तिम स्वीकृति प्रदान गर्दै गत आर्थिक वर्षको वार्षिक प्रतिवेदन सहितका वित्तीय विवरणहरू पारित गर्नुका साथै चालू आर्थिक वर्षको लागि लेखापरीक्षक नियुक्ति र निजको पारिश्रमिक निर्धारणको विषय टुङ्ग्याउनेछ ।

साथै कम्पनीको प्रबन्धपत्र तथा नियमावली अभिलेख गर्ने र नियामक निकायबाट कुनै फेरबदलको निर्देशन भएमा त्यसको जिम्मेवारी सञ्चालक समितिले पूरा गर्ने गरी अख्तियारी प्रदान गर्ने विषय पति सभाले टुङ्ग्याउनेछ । साधारण सभा प्रयोजनका लागि कम्पनीले फागुन १२ गते एक दिन बुक क्लोज गर्न लागेको छ । बुक क्लोजको आधारमा फागुन ८ गतेसम्म कायम शेयरधनीहरू मात्र सभामा भाग लिन र लाभांश प्राप्त गर्न सक्नेछन् ।