जनकपुरधाम । आन्तरिक राजस्व कार्यालय जनकपुरधामले आर्थिक वर्ष २०८०/८१ को फागुन मसान्तसम्ममा लक्ष्यभन्दा बढी राजस्व संकलन गरेको छ । कार्यालयले ८ महीनामा रू. २ अर्ब ८९ करोड ३३ लाख ९७ हजार राजस्व संकलन गरेको छ, जुन सो अवधिको लक्ष्यको १०१ दशमलव ५१ प्रतिशत हो ।

कार्यालयले फागुनसम्ममा आयकरबाट ६९ करोड ७१ लाख, बहाल करबाट २ करोड ७ लाख, ब्याज करबाट ६ करोड, मूल्य अभिवृद्धि करबाट ५७ करोड १७ लाख, अन्त:शुल्कबाट १ अर्ब ५४ करोड २० लाख, स्वास्थ्य शुल्कबाट २ लाख र अन्य स्रोतबाट १४ लाख राजस्व संकलन भएको प्रमुख कर अधिकृत आनन्दकुमार गुप्ताले जानकारी दिए । धनुषा जिल्लाभर विभिन्न क्षेत्रमा १ लाख ४८ हजार ४६३ व्यवसाय तथा फर्म दर्ता भएका छन् । कार्यालयका अनुसार गतवर्ष सोही अवधिमा १ लाख ३० हजार ५८० व्यवसाय तथा फर्म दर्ता थिए ।

कार्यालय प्रमुख कर अधिकृत गुप्ताका अनुसार शिक्षा स्थायी लेखा नम्बर (प्यान) लिने संस्था ९५ ओटा, अन्त:शुल्क स्थायी लेखा नम्बर लिने १ हजार ५०५, स्वास्थ्य स्थायी लेखा नम्बर लिने ६९, आयकरमा दर्ता ३९ हजार २८३, व्यक्तिगत प्यान लिने ९८ हजार २२७ र मूल्य अभिवृद्धि करमा दर्ता ८ हजार ६३१ व्यवसाय तथा फर्म रहेका छन् । नेपाल उद्योग वाणिज्य महासंघ मधेश प्रदेशका कार्यकारी निर्देशक प्रदीप दत्ताका अनुसार राजस्व संकलन वृद्धि हुनु सकारात्मक भए पनि व्यवसायीहरू बैंक ऋण तिर्न नसक्दा व्यवसाय बन्द गर्ने स्थितिमा पुगेका छन् । उनका अनुसार बजारमा लगानी भएको पूँजी फसेका कारण व्यवसायीहरू आर्थिक संकटमा परेका छन् ।

जनकपुरधाम क्याम्पसस्थित एण्ड बरकाती ट्रेडर्सका सञ्चालक वसीम अख्तरले पछिल्ला केही वर्षमा जनकपुरधामको व्यापार व्यवसाय शिथिल बनेको बताए । यसले समयमा आन्तरिक राजस्व तिर्न र बैंक ऋण चुक्ता गर्न कठिनाइ भइरहेको उनको भनाइ छ ।