काठमाडौं । एनएमबि क्यापिटल लिमिटेडले थप एक नयाँ सामूहिक लगानीकोष योजना सञ्चालनका लागि माघ २४ गतेदेखि निष्कासनमा ल्याएको इकाई फागुन ८ गतेसम्म निष्कासनमा रहने भएको छ ।

क्यापिटलले एनएमबि हाईब्रिड फण्ड एल–२ नामक योजना सञ्चालनका लागि माघ २४ गते आजदेखि इकाई निष्कासन गरेको छ । क्यापिटलले एनएमबि म्युचुअल फण्ड अन्तर्गत यो योजना सञ्चालन गर्न लागेको हो । दश वर्षे अवधिको बन्दमुखी प्रकृतिको यस योजना सञ्चालनका लागि क्यापिटलले १० करोड २० लाख इकाई सार्वजनिक निष्कासनमा ल्याएको हो ।

यी इकाई छिटो अवधि माघ २८ गतेसम्म निष्कासनमा रहने मिति तय भएकोमा सो अवधिसम्म माग बमोजिम आवेदन नपरेपछि योजना व्यवस्थापकले ढिलो अवधि फागुन ८ गतेसम्मको मिति तय गरेको हो । यो योजना सञ्चालनका लागि योजना व्यवस्थापकले प्रतिइकाई १० रुपैयाँ अंंकित मूल्यमा १ अर्ब २० करोड रुपैयाँ बराबरको १२ करोड इकाई जारी गर्न लागेको हो ।

१२ करोड इकाईमध्ये १४ प्रतिशत अर्थात् १ करोड ६८ लाख इकाई कोष प्रवर्द्धक एनएमबि बैंकलाई र १ प्रतिशत अर्थात् १२ लाख इकाई योजना व्यवस्थापक एनएमबि क्यापिटललाई छुट्याइएको छ । यी बाहेक बाँकी रहेको १० करोड २० लाख इकाई भने सार्वजनिक निष्कासनमा ल्याइएको हो । 

आवेदन दिंदा न्युनतम १०० इकाईदेखि अधिकतम १ करोड २० लाख इकाई सम्म माग गर्न सकिनेछ । निष्कासन तथा विक्री प्रबन्धकको रुपमा रहेको एनएमबि क्यापिटल र आस्बा सेवा सहभागी सम्पूर्ण बैंक तथा वित्तीय संस्थाबाट आवेदन दिन सकिने व्यवस्था छ । साथै मेरो शेयर अनलाइन मार्फत पनि आवेदन दिन सकिनेछ ।