काठमाडौं । एनएमबि लघुवित्त वित्तीय संस्था लिमिटेडले चालू आर्थिक वर्ष (आव)को पहिलो त्रैमासिक वित्तीय विवरण सार्वजनिक गरेको छ । उक्त वित्तीय विवरण अनुसार कम्पनीको नोक्सानी गत आवको पहिलो त्रैमासको तुलनामा चालू आवको सोही अवधिमा बढेको छ । गत आवमा कम्पनी रू. ८५ लाख ७२ हजार नोक्सानीमा रहेकोमा चालू आवमा बढेर रू. ४ करोड ७३ लाख पुगेको हो ।
चालू आवमा कम्पनीको आम्दानी घटेकाले र इम्पेयरमेन्ट चार्ज बढेकाले नोक्सानी बढेको हो । गत आवको तुलनामा चालू आवमा कम्पनीको खुद ब्याज आम्दानी ३४ दशमलव १५ प्रतिशत घटेको छ । गत आवमा कम्पनीले रू. ८ करोड ७२ लाख खुद ब्याज आम्दानी गरेकोमा चालू आवमा घटेर रू. ५ करोड ७४ लाखमा झरेको हो ।
त्यस्तै गत आवमा कम्पनीको इम्पेयरमेन्ट चार्ज रू. १ करोड ५५ लाख रहेकोमा चालू आवमा बढेर रू. २ करोड ६१ लाख पुगेको छ । सोही कारण कम्पनीको सञ्चालन नाफा पनि रू. ४ करोड ७० लाख ऋणात्मक छ ।
त्यस्तै कम्पनीको निष्क्रिय कर्जा गत आवमा ५ दशमलव ६८ प्रतिशत रहेकोमा चालू आवमा बढेर ७ दशमलव २७ प्रतिशत पुगेको छ । गत आवमा कम्पनीको प्रतिशेयर आम्दानी ५ रुपैयाँ २३ पैसा ऋणात्मक रहेकोमा चालू आवमा पनि २६ रुपैयाँ २५ पैसा ऋणात्मक रहेको छ ।
कम्पनीको चुक्ता पूँजी रू. ७२ करोड १४ लाख रहेको छ । चालू आवमा कम्पनीले जगेडामा रू. १९ करोड ८४ लाख र शेयर प्रिमियममा रू. ७ करोड २९ लाख सञ्चिति गरेको छ । रिटेन्ड अर्निङ भने रू. ३ करोड २६ लाख ऋणात्मक छ । सोही अवधिमा कम्पनीको प्रतिशेयर नेटवर्थ १ सय ३३ रुपैयाँ १० पैसा र तरलता अनुपात ८ दशमलव ९० गुणा छ ।
