काठमाडौं । एनएमबि म्युचुअल फण्डअन्तर्गत सञ्चालित दुई योजनाले लाभांश प्रयोजनका लागि बुक क्लोजको मिति तय गरेका छन् । क्यापिटकै व्यवस्थापनमा सञ्चालित एनएमबि फिफ्टी र एनएमबि हाईब्रिड फण्ड एल–१ ले प्रस्तावित लाभांश प्रयोजनका लागि असोज १२ गते बुक क्लोज गर्न लागेका हुन् ।

दुवै योजनामा बुक क्लोजको अघिल्लो दिनसम्म कायम इकाईधनीहरूले मात्र लाभांश प्राप्त गर्न सक्नेछन् । गत आर्थिक वर्ष ०७९/८० को मुनाफाबाट एनएमबि फिफ्टीले करसमेत १५ प्रतिशत र एनएमबि हाईब्रिड फण्ड एल–१ ले पनि करसमेत १५ प्रतिशत नै प्रतिफल वितरण गर्ने प्रस्ताव गरेका हुन् ।

सात वर्षे अवधिको बन्दमुखी प्रकृतिको योजनाको रूपमा सञ्चालित एनएमबि फिफ्टीले १२ करोड ५० लाख इकाई जारी गरेको थियो ।योजनाको प्रतिइकाई खुद सम्पत्ति मूल्य साउन मसान्तसम्म १२ रुपैयाँ २२ पैसा छ ।

त्यस्तै सात वर्षे अवधिकै बन्दमुखी प्रकृतिको एनएमबि हाईब्रिड फण्ड एल–१ ले भने १० करोड इकाई जारी गरेको थियो । साउन मसान्तसम्म यस योजनाको प्रतिइकाई खुद सम्पत्ति मूल्य १२ रूपैयाँ ६ पैसा रहेको छ ।