काठमाडौं । एनएमबि क्यापिटल लिमिटेडको व्यवस्थापनमा सञ्चालित एनएमबि हाइब्रिड फण्ड एल–१ कात्तिक ८ गतेदेखि परिपक्क हुने भएको छ । योजना परिपक्क हुन लागेसँगै खारेजी प्रक्रिया अघि बढाइने योजना व्यवस्थापकले जानकारी दिएको छ ।
सामूहिक लगानीकोष नियमावली अनुसार योजनाको अवधि समाप्त भएमा योजना खारेजीमा लग्नुपर्ने व्यवस्थाबमोजिम उक्त प्रक्रिया अघि बढाइएको योजना व्यवस्थापकले जानकारी दिएको छ ।
योजना खारेजी सूचना प्रकाशन गरेपछि योजनाको कारोबार गर्न/गराउन नहुने व्यवस्थाबमोजिम असोज २५ गतेसम्म कायम भएका इकाईधनीहरू मात्र योजनाको खारेजी पश्चातको प्रतिफल प्राप्त गर्न योग्य भएको जानकारी समेत योजना व्यवस्थापकले गराएको छ ।
योजना खारेजीपश्चात् योजना अन्तर्गतको सम्पत्तिलाई नगदमा परिणत गरी इकाईधनीहरूलाई उनीहरूको स्वामित्वको आधारमा भुक्तानी दिनुपर्ने व्यवस्थाबमोजिम फिर्ता भुक्तानी गरिनेछ ।
यस योजनाको इकाई खरीद गरी हालसम्म पनि आफ्नो नाममा रहेको इकाई अभौतिकीकरण नगराएका इकाईधनीहरूलाई यथाशीघ्र गराउनसमेत योजना व्यवस्थापकले आग्रह गरेको छ । साथै विगतका वर्षहरूको नगद लाभांश लिन बाँकी इकाईधनीहरूले आफ्नो बैंक खाता नम्बर हितग्राही खातामा अद्यावधिक गराई प्रतिफल प्राप्त गर्नसमेत भनिएको छ । यस योजनाले गत आर्थिक वर्ष ०७९/८० को मुनाफाबाट १५ प्रतिशत करसमेत नगद लाभांश वितरण गरिसकेको छ ।
असोज २१ गतेदेखि योजनाको प्रतिफल वितरण गर्न शुरु गरिएको छ । सात वर्षे अवधिको बन्दमुखी प्रकृतिको यस योजना सञ्चालनका लागि नेपाल धितोपत्र बोर्डले २०७३ भदौ १४ गते अनुमति प्रदान गरेको थियो । योजना सञ्चालनका लागि १० करोड इकाई जारी गरिएको थियो ।
भदौ मसान्तसम्मको वित्तीय विवरण अनुसार योजनाको खुद सम्पत्ति १ अर्ब १७ करोड ८६ लाख रुपैयाँभन्दा बढी छ । सो अवधिसम्म योजनाको प्रतिइकाई खुद सम्पत्ति मूल्य ११ रुपैयाँ ७९ पैसा छ ।
